Şaredarîya Peyasî ya Dîyarbekirî Peyas de 120 darî seba ke şaristanî re cayo zergun bêro qezenckerdiş ronaybî. Labelê darî hetê kesanê ke nasnameyê înan bewlî nîyo ra ameyî birînayîş û cayê xo ra ameyî antiş. Bi no qayde Dîyarbekir de qetlîamê daran ame kerdiş. Eşkerayîya ke hetê şaredarîye ra amey dayîş de ame vatiş ke herême de do darê neweyî bêrê ronayîş.
Midurîya Park û Baxçeyan a Şaredarîya Peyasî, seba ke şaristanî rê cayêko kesk qezenc bikero, par Taxa Talaytepe de, erazîyêko veng o 51000 metrekare de, darî ronaybî. Cayê ke tede darî ameybî ronayîş de, 120 darê ke 7-10 serre bîyî, hetê kesanê ke nasnameyê înan bewlî nîyo ra ameyî birînayîş.
Hetkara Serekê Şaredarîye Gulîstan Nazliere eşkerayîyêk da û vat, “Seba ke bajar rê yew cayêko kesk o newe bêro qezenckerdene, ma serra vîyarte nê cayî de xeylêk darî ronaybî. Seranserê serre de ma seba ke nê darî bibê zergun emegêko pîl da. Ma seba yew bajarêko hîna kesk hewl danê la tayê kesî yenê û daran birînenê û qetlîamê daran kenê. Ma do seba cezakerdiş û teşhîrkerdişê înanê ke nê qetlîamê daran viraşto xîret bike.” Midurîya Park û Baxçeyan zî eşkera kerd ke herême de demêko tewr kilm de do darê neweyî bêrê ronayîş.
