Qiseyê Kurdkî (Kurmanckî) yê ke Serekê Meclîsî Tirkîya (TBMM) Numan Kurtulmuşî qiseykerdişê xo yê Dîyarbekirî de vatî, hesabê medyaya sosyale yê resmî yê Meclîsî ra zî ameyî parekerdene. Bi nê parekerdişî, tarîxê Meclîsî de reya verêne yew parekerdişê bi Kurdkî ca girewt.
KURTULMUŞÎ RA MESAJÊ "AŞTÎYE" BI KURDKÎ
Kurtulmuşî, Merasîmê Akerdişê Akademîkî yê Serra Perwerdeyî ya 2025–2026î yê Unîversîteya Dîcle de, peynîya qiseykerdişê xo de bi vateyanê "Bi hev re bibin, dil bi dil, dest bi dest; aştî li nav me ra best" silam da. Nê vateyî bi Tirkî manaya "Birlik olalım, gönül gönüle, el ele; barış aramızda hüküm sürsün" (Wa ma pîya bê, zerrî bi zerrî, dest bi dest; wa aştîye mabênê ma de bibo) danê.
TARÎXÊ MECLÎSÎ DE REYA VERÊNE
Nê vateyê Kurtulmuşî, hesabê medyaya sosyale yê resmî yê Meclîsî ra zî bi eynî hawa, bi Kurdkî ameyî parekerdene. Bi no hawa, tarîxê Meclîsî de reya verêne yew parekerdişê bi Kurdkî virazîya.
Kurtulmuşî, programê "Pêvînayîşê Komelê Sîvîlî yê Dîyarbekirî" ra dima, cewab da persanê rojnamegeran ê derheqê zîyaretê Dîyarbekirî û rojdemî de.
Persa "Hesabê resmî yê Meclîsî ra hetanî ewro bi desan ziwananê cîyayan de parekerdişî virazîyayî. Şima programê unîversîte de şîîrêke bi Kurdkî wende û hesabê resmî yê Meclîsî ra ame parekerdene. Ê ke krîtîk kerdî zî bîyî, ê ke weş kerdî zî bîyî... Şima na babete de wazenê se vajê?" ser o Kurtulmuşî va: "Ez wina fikirîna ke herikîyayîşê qiseykerdişî tam cayê xo de ronişt. Manaya ci, yew rêza Kurdkî bîye ke pîyabîyayîş, destbidestbîyayîş, mîyanê aştîye de bîyayîş û mabênê ma de estbîyayîşê huzur û asayîşî waştêne. Ez o qenaet de ya ke no do paştî bido birayî û asayîşê Tirkîya."
TEMASÊ DÎYARBEKIRÎ DEWAM KENÊ
Serekê Meclîsî Numan Kurtulmuş û endamê komîsyonî yê ke ey reyde yê, çarçeweyê temasanê xo yê prosesê çareserîye de Dîyarbekir de yew rêze zîyaret û pêvînayîşan virazenê.
