Fuarê Kitaban ê Dîyarbekirî yê 9., yo ke hetê TÜYAPî ra bi hemkarîya Yewîya Weşangêran a Tirkîya mabênê tarîxanê 18-26ê Teşrîna Verêne 2025î de yeno viraştene, dest pêkerd. Fuaro ke bi tewrbîyayîşê 400 ra zêdeyêr weşanxane û sazîyanê komelê sîvîlî virazîyeno, bi seyan nuştoxan û wendoxan ano pêser.
WEŞANGÊRÊ ZAZAKÎ FUAR DE YÊ
Fuar, bi taybetî mêmanîya weşanxaneyanê ke Zazakî weşan kenê, eleqeyê wendoxan anceno ser. Nê çarçeweyî de, Weşanxaneyê Vateyî standê xo yê ke Salona 2. de yo, de wendoxanê xo paweno, kitabê Weşanxaneyê Roşna yê 77 tewirî zî standê Weşanxaneyê Nûbiharî de yenê mojnayîş. Nînan ra ber, Zîwan-Komî zî bi standê xo fuar de ca gêno û bîyo merkezê sohbetanê Zazakî. Teberê nê standan, standê Weşanxaneyê Avesta de zî kitabê Zazakî resenê wendoxan.
CAYÊ PÊVÎNAYÎŞ Û MUNAQEŞEYAN Ê KULTURÎ
Standê weşanxaneyanê Kurdkî tena cayê rotişê kitaban nîyê, eynî wext de sey cayê pêvînayîş û munaqeşeyan ê kulturî zî xizmet danê. Wendoxî û nuştoxî nê standan de derheqê ziwan, edebîyat û kitaban de sohbet kenê û fikranê xo yewbînan reyde pare kenê. Fuar, heta tarîxê 26ê Teşrîna Verêne do seba zîyaretkerdoxan akerde bo û seba wendoxanê Zazakî firsendêko muhîm pêşkêş keno.
