ZAZAKÎ NEWS– Goreyê cewabê Wezîrê Perwerdeyî yê Mîllî Yusuf Tekînî, serrgêra perwerdeyî ya 2024-2025î de 27 hezarî ra zêdeyêr wendekaran Kurdkî (Kurmanckî) û 3 hezarî ra zêdeyêr wendekaran zî Kurdkî (Zazakî) sey dersa weçînite weçîna.
Parlamentera Wanî ya DEM Partî Gulcan Kaçmaz Sayyîgît, derheqê dersanê Ziwan û Lehçeyan ê Cuyenan ê ke mekteban de yenê dayene de, Wezîrê Perwerdeyî yê Mîllî Yusuf Tekînî rê persnameyêk da. Sayyîgît, serrgêra perwerdeyî ya 2012-2013î, rewşa peyêne ya dersanê Kurdkî pers kerdbi. Wezîr Tekînî, cewabê xo yê seba persnameyî de, derheqê eleqeyê vera nê dersan û tayînkerdişê maliman de malumato hîra da.
Tercihê Kurmanckî û Zazakî aşkere bîyî
Wezîr Tekînî îfade kerd ke serrgêra perwerdeyî ya 2024-2025î de, 196 mektebanê fermîyan de, 27 hezar û 15 wendekaran dersa weçînite ya Kurdkî (Kurmanckî) weçînaya. Hetê bînî ra, 30 mektebanê cîyayan de zî 3 hezar û 510 wendekaran dersa weçînite ya Kurdkî (Zazakî) weçînaya.
Tayînkerdişê maliman û rewşa perwerdeyî
Goreyê malumatê wezaretî, ame eşkerakerdiş ke mabênê serranê 2014-2025î de, warê Ziwan û Lehçeyan ê Cuyenan (Kurdkî-Kurmanckî) de 153 malimî, warê Ziwan û Lehçeyan ê Cuyenan (Kurdkî-Zazakî) de zî 47 malimî ameyê tayînkerdiş.
