ZAZAKÎ NEWS- Çewlîg de, bi taybetî Taxanê Mîrzan û Merkezî de, pêsayîşê awe yo ke demêko derg o dewam keno, şar kerd perîşan. Şaro ke hînî îsyan kerd, rayîr girewt û hêrsê xo mojna.
Bi ameyîşê aşmanê amnanî, Çewlîg de problemê pêsayîşê awe hîna zêde bîyo. Şêlikê Taxanê Merkez û Mîrzanî, ke vanê rojan ra nata awe nêna keyeyanê ma, verê depoyê awe yê taxe de ameyî pêser û rayîr trafîkî rê girewt. Şêlikê taxe ke wazeno vengê xo bihesno, îfade kerd ke no zehmetîyo ke ê ancenê, hînî tehemul nêbeno.
"Awa ma roşenê mutehîtan!"
Yew cinîya ke taxe ra ya bi nameyê Şefîka Yilmaz, îsyanê xo bi nê vateyan îfade kerd:
“Ez çend hewe şîya beledîye, mi serekê beledîye Erdal Arikanî dir qisey kerd. La mi netîceyêk nêgirewt. 3 serrî yo awe ma tim nêna keyeyê ma. Demê Serdar Atalayî de awe estbî, demê Yucel Barakgazîyî de awe ameyêne. Nika çira çin a? Awa ma cayêko bîn rê roşenê. Danê mutehîtan, danê înşaatan. Hefteyan ra nata kincî makîne de pawenê. Ma heta siba kontrol kenê, gelo awe yena. Ne şewe awe esta ne zî roje! Mîyanê keyeyî ra hînî boya pîse yena. No serek derdê şarî rê çare nêvîneno, ma rê hêrs beno. Hînî bes o!”
“Ma do şirê vere Beledîye!”
Welatî vanê ke eke mesele çare nêbo, ê do xoverodayîşê xo berê verê bînaya beledîye. Şaro ke semedê bêawîye ra nêeşkeno lazimtîyanê xo yê bingeyênan sey pakîye û awa şîmitişî bîyarê ca, veng da Beledîyeya Çewlîgî ke wezîfeyê xo bîyaro ca.
Muxtarê Taxa Mîrzanî Hanefî Baraçî zî paştî da reaksîyonê welatîyan û îfade kerd ke meseleya awe yew meseleyêka raşt û cîddî ya. Muxtarî, va ma waştişê xo yê şaredarîye reyde pêvînayîşî ardê ziwan, wina va: "Serekê ma yê Şaredarîye zî meseleya awe ra hayîdar o. Nika seba ke awa Kürükî biresnê taxan, xebatî virazîyenê."
Çimeyê xebere: Bingöl Kent Haber