Qiseykerdoxa DEM Partî Ayşegul Dogane, merkezê pêroyî yê partîya xo de kombîyayîşêko çapemenîye viraşt û derheqê rojdemî de qisey kerd.
Dogane, bale ante ser ke ganî qerarê Mehkemeya Heqanê Merdiman a Ewropa (MHME) cade bêrê tatbîqkerdiş û va ke ganî Komîsyonê Yewîya Neteweyî, Paştîdayîşî û Demokrasîye yo ke Meclîs de çarçeweyê prosesê çareserîye de ronîyayo, seba ke Abdullah Ocalanî reyde pêvînayîş bikero, şêro Îmralî.
"Qeraranê Demîrtaşî û Mizrakliyî de neheqîye dewam kena"
Dogane, ard vîrî ke qerarê îxlalî yo ke MHME derheqê Hemseeokê verênî yê HDPyî Selahedîn Demîrtaşî de dayo, qetî bîyo.
Dogane va, "Ma pêro rojan ra nata her deqîqe xeberanê veradayîşî pawenê û bi diqet teqîb kene "Çîyê ke ganî bêrê kerdene bewlî yê, la çîyo ke lazim o nêno kerdiş. Neheqîya ke 9 serrî yo israr bena, hema zî israr bena. Ganî rewşa tepişteyîye ya Selahedîn Demîrtaşî biqedîyo" û reyna vengdayîşê veradayîşê lezabezî kerd.
“Wa Komîsyon şêro Îmralî”
Ayşegul Dogane, behsê xebatanê komîsyonê prosesî yê Meclîsî zî kerd. Dogane va “Ma êdî yew dewr de yê ke tede qiseyî nê, gamê ke goreyê nê qiseyan ê, bêrê eştene. Hewcedarî bi gamanê pratîk, zelal, yê ke goreyê huqûqî yê û edaletî anê ca, esto.”
