Enwer Yılmaz
ZAZAKÎ NEWS - NextGen Kurdî yo ke merkezê xo Amed de yo, seba zêdekerdişê tewrbîyayîşê (beşdarbîyayîşê) demokratîkî yê cîwananê Kurdan û hîrakerdişê warê munaqeşeyanê kamuyîyan yê bi Kurdkî, fealîyetanê cîya-cîyayan rameno. Însîyatîf armanc keno ke dîyalogê sîvîlî yê mabênê cîwanan de xurt bikero; eynî wext de xebatanê îdarekerdişê beşdarkarî, afernayîşê (viraştişê) tedeyanê medyayî û averberdişê kapasîteya demokratîke zî pîya rayra bero.
Însîyatîfo ke bi hemkarîya sazgehanê cimatê sîvîlî, dezgehanê kulturî, torranê cîwanan û yewîyanê îdareyê herêmî xebatanê xo domneno; wazeno ke cîwanê Kurdî pozîsyonê temaşekerdoxîya bêvenge ra bivejîyê û bi awayêko aktîf tewrê pratîkanê welatîbîyayîşî bibê.
Forumê cîwanan yenê viraştene
Forumanê cîwanan ê ke hetê NextGen Kurdî ra yenê organîzekerdene de, babetê ke rasterast tesîrê cuyayîşê rojaneyî yê cîwanan kenê, yenê destgirewtene. Foruman de sernameyê (babetê) sey kultur û huner, cinîye û spor, prosesê aştîye, ekolojî û cuyayîşê bajarî, onca bajar de zêdebîyayîşê antişê madeyan (tîryak) ser o zî sohbetî û xebatî yenê kerdene.
Munaqeşe û tecrubeyê ke foruman de vejîyenê werte, dima ra çarnîyenê tedeyanê vîdeoyanê kilman û platformanê dîjîtalan de yenê weşanayene. Bi vasîtaya îçerîkanê ke YouTube û Instagramî ser o yenê parekerdene, yeno hedefkerdene ke cîwanî ameyîşê beşdaranê neweyan rê bibe wesîle û zêdeyêr bikewê mîyanê nê munaqeşeyan.
Tedeyê dîjîtalî yenê afernayene
Vîdeoyê kilmî yê ke goreyê munaqeşeyan û vatîşanê mîyan foruman amade benê, platformanê medyayê sosyale de yenê weşanayene. Bi vasîtaya nê tedeyna; şîroveyî, mesajî û anketê ke cîwanan ra yenê, rojdemê forumêko bîn zî bewlî kenê.
Însîyatîf bale anceno serê naye ke, cîwanê Amedî warê beşdarbîyayîşê sîvîlî de rastê astengîyanê cîya-cîyayan yenê. Tengbîyayîşê warê sîvîlî, dûrkerdişê cîwanan ê prosesê qerardayîşî ra û xebitnayîşê Kurdkî yê munaqeşeyanê kamuyî de, sey nê astengîyan yenê mojnayene.
NextGen Kurdî vano keno ke famkerdişê dîjîtal ê cîwanan û hewcedarîya mîmarîya sîyasetê bi ziwanê dayîke, nê warî de seba înan yew firsendo muhîm vejeno meydan.
Dema pîlote do şeş aşmî bidomno
Tetbîqatê pîlot yê projeyî, mabênê tarîxanê Kanûna 2025î û Gulana 2026î de yeno ramitene. Nê prosesî de her aşme, forumê Kurdkî de 20-25 kesî ca gênê.
Dima her forumî, nezdîya di hefteyan de 4 heta 6 vîdeoyê kilmî yê ke mabênê 30 - 90 sanîyeyan ra pê yenê, amade benê û dîjîtal de vila benê
Xebatê Zazakî zî yenê plankerdene
Ziwano ke NextGen Kurdî xebatanê xo pîya rameno de zafaneyê ci bi Kurmancî yo, la ame eşkerakerdene ke sibaroj yeno plankerdene ke beşêkê foruman û tedeyanê medyayî bi Zazakî (Kirmanckî) zî bêrê viraştene.
