ZAZAKÎ NEWS - Amadekarîyê Festîvalê Kulturê Dêrsimî yê Ewropa yê 16. dest pêkerdî. Komîteya amadekarîye Oberursel de ame pêser û seba bernameyê festîvalî fîkr û pêşnîyazî girewtî.
Komîteya amadekarîye ya Festîvalê Kulturê Dêrsimî yê Ewropa yê 16. ke do mabênê tarîxanê 5 û 6ê Hezîrana 2026î de bêro viraştene, Merkezê Kulturê Elewîyan ê Oberurselî de ameye pêser.
Kombîyayîşê amadekarîye yê festîvalî ke do bi serekîya Federasyona Elewîyan a Demokratîke (FEDA), Federasyona Yewîyanê Dêrsimî yê Demokratîkan ê Ewropa (ADEF) û Kongreya Awanîya Dêrsimî (DÎK) bêro viraştene, temsîlkarê Komeleyanê Qoçgîrî, Komeleya Civrakî ya Ewropa, Komeleya Kurmeşijan, Dersim Spor Rüsselheim, AKMê Alzey û AKMê Oberurselî reyde nuştox û hunermendê Dêrsimijî tewrê ci bîy.
Kombîyayîşo ke bi deqîqeyêk rêzgirewtişî dest pêkerd, bi ercînayîşê Festîvalê Kulturê Dêrsimî yê Ewropa yê 15. start girewt. Dima ra seba festîvalo ke do aşma Hezîrane de bêro viraştene, fîkr û pêşnîyazî ameyî pêşkêşkerdene.
Komîteya amadekarîye da zanayene ke ê do pêşnîyazanê ke ameyê kerdene ser o pêvînayîş bikerê. Ame eşkerakerdene ke kombîyayîşo bîn do 15ê Sibate de Frankfurt de bêro kerdene.