Dengbêj Elîyê Qerejdaxî, yo ke yew aşme verê cû krîzê qelbî vîyarnabi û Nêweşxaneyê Zanîngeha Dîcle de binê tedawî de bi, merd.
Dengbêj Elîyê Qerejdaxîyî, 26ê Teşrîne de wexto ke şîyêne keyeyê xo yê qezaya Peyasî ya Amedî, krîzê qelbî vîyarnabi. Elîyê Qerejdaxî Nêweşxaneyê Zanîngeha Dîcle ya Amedî de amêne dermankerdiş.
Nêweşxane de 2yê Kanûne de anjîyo bibî.
Ame zanayîş ke Elîyê Qerejdaxî yo ke Nêweşxaneyê Zanîngeha Dîcle de binê tedawî de bi, ewro wextê serê sibayî dinyaya xo bedilnayo.
Cenazeya Elîyê Qerejdaxî Goristanê Yenîkoyî yê Amedî de amey defin kerdi.
Dengbêj Elîyê Qerejdaxî kam o?
Elîyê Qerejdaxî dengbêj û bilûrcenêk bi ke hewt serrîya xo ra nat her di çimê ey nêdîyêne. O serra 1963yan de Dewa Sadî ya Amedî de ameyo dinya. Mekteb nêwendo. Zewicîyaye bi û di tutê ey estbîy. Keyeyê Dengbêjan ê Amedî de dengbêjîye kerdêne û bilûre cînitêne.