ZAZAKÎ NEWS- Hunermendo herêmî yo naskerde Mehmet Emîn Erden, o ke mîyanê şarî de bi nameyê Emîn Erbanî şinasîyeno, 60 serrîya xo de şi heqîya xo ser. Erbanî yo ke bi taybetî veyveyan de deyîrî vatêne, nêweşxaneyo ke tede tedawî vînayêne de dinyaya xo bedilna.
Hunermend Mehmet Emîn Erden (Emîn Erbanî), nezdîyê 3 serrî bi ke vera nêweşîyêka girane û xirabe mucadele kerdêne. Erden, vizêr şan wexto ke rewşa ey giran bîye wedarîya nêweşxane. Labelê ewro saetanê nêmerojî de, 60 serrîya xo de merd.
Emîn Erbanî kam o?
Nameyo raştîn ê hunermend Emîn Erbanîyî Mehmet Emîn Erden o. O, serra 1966î de qezaya Mêrdînî Qoser de, Dewa Erbanî de ameyo dinya.
Emîn Erbanî wexto ke 7 serre bi, keyeyê ey bar kerd şi Qoser. Wextê domanîya xo de bi muzîkî eleqedar bi. 17 serrîya xo de, mîyanê orkestrayanê qeza de kişta hunermendanê herêmîyan de dest bi cinitişê saz û vatîşê kilamanê veyveyî kerd.
Dima ke wezîfeyê leşkerîye temam kerd, serra 1988î de kasetê xo yo verên bi nameyê "Lê Aynur Gavur Aynur" vet. Bi nê eserî şinasîya.
Hunermend Emîn Erbanî, veyveyan de kilamê govende yê kulturê herême yê hereketînî sey 'Cîda, Govend, Giranî, Delîlo' vatêne. Erbanî, bi taybetî bi eserê xo yê “Şampîyon Dîyarbekir”î, zerrîya Amedijan û pêro şarê herême de ca girewt. Dima ra, kasetê sey 'Aysel, Leyla, Bêrîvan'î zî mîyan de yê 15 kasetî vetî û xeylêk klîbî antî. Hunermendî tewr peynî serra 2014î de eserêkê neweyî yo bi nameyê “Dîyarbekir”î amade kerdbi û seba ey klîbêk zî antbi.
