Futbolbazo verên ê Amedsporî Denîz Nakî kam o û çira hende yeno heskerdiş?
Denîz Nakî, ke 9ê Temmuza 1989î de ame dinya, eslê xo de Dêrsimij o la Almanya de pîl bîyo. Goreyê serra 2025î, o 36 serre yo. Futbolî rê tewr verî FC Düren 77 de dest pêkerd û heta serra 2003î FC Düren-Niederau de kay kerd.
Kariyerê ey û tîmê ke tede kay kerd
Denîz Nakî, serra 2003î de transferê Bayer 04 Leverkusenî bi. Dima ra, tîma Leverkusen U-19, Bayer 04 Leverkusen, Rot Weiss Ahlen û peynî de zî Amedsporî de kay kerd. Nakî, sewîyeyanê cîya-cîyayan ê Almanya de zî formaya mîlî dayo xora.
Kariyerê Denîz Nakî yo bi Min-u-Mecî: Hêrişî, Cezayî û Zîndan
Denîz Nakî, ke verî zî Tirkîya de futbolî ra heta-hetanî (emrê xo pêro) men bîbî, kariyerê ey tim bi hedîseyanê cîyayan ame rojeve.
Tirkîya de futbolî ra heta-hetanî men bi
Denîz Nakî, ke sezonê 2013/14î de Gençlerbirliğî de kay kerdêne, wextê hedîseyanê Kobanê de semedê eşkerayîyanê xo ra Enqere de rastê hêrişî amebî. Serra 2014î de kontratê ey bi ê taximî reyde amebî fesihkerdene.
Nakîyo ke dima ra transferê Amedsporî bi, derheqê ey de demê Hedîseyanê Xendekan ê Sûr û Cizîre de semedê parekerdişanê ey ê medya komelkî proseso huqûqî dîyabi destpêkerdene. Nakî, maçê Mersin İdmanyurduyî ra dima rastê hêrişê yew terefdarî amebi.
Heyetê Dîsîplînî yê Futbolî yê Profesyonelî (PFDK), wexto ke proseso huqûqî dewam kerdêne, kaykerê Amedsporî Denîz Nakî rê 3 serrî û 6 aşmî musabeqayan ra men û 273 hezar lîra ceza pereyî birna. Semedo ke na ceza 3 serran ra vîyarte, goreyê qaydeyan o Tirkîya de futbolî ra heta-hetanî men bi.
Almanya de hêriş û zîndan
Nakî Almanya de wexto ke bi erebaya xo rayîr ser o bi, rastê yew hêrişê çekdarî amebî. Hêrişî ra dima, Nakî medya komelkî ser o eşkere kerdbî ke o do nêageyro Tirkîya.
Nakî, ke semedê yew hedîseyê edlîyî ra Almanya de 1 serre tepişte mend, aşmanê vîyarteyan de veradîyabî.
Denîz Nakî, ke Tirkîya de futbolî ra men o, dima ra îlan kerd ke o transferê tîma SV Kürdistan Dürenî ya Almanya bîyo.
