ZAZAKÎ NEWS - Derheqê tepişteyê nêweşî yo 85 serre Sıddık Gülerî de qerarê veradayîşî (texlîye) ame dayîş. Gülero ke Hepisxaneyê Tîpê Tyî yê Îskenderûnî de mendêne, hetê Sazîya Tibê Edlî (ATK) ra rapor ame dayîş ke "nêeşkeno bi sereyê xo heyatê xo bidomno".
Avukatê Gülerî seba ke muwekîlê înan ATK rê bêro şawitiş, muracatê Serdozgerîya Komare ya Îskenderûnî kerdbi.
Güler, 20ê Hezîrane de ATK rê ame şawitiş. Heyetê 11. yê Îxtîsasî yê ATKyî, raporê xo yo derheqê muayeneyî de 27ê Hezîrane de amade kerd. Heyetî qirarê xo de îşaret bi serre, problemanê weşîye, dermananê ke şuxulneno û raporanê nêweşxaneyî yê Gülerî kerd û raporêko winasî amade kerd: "Heyatê xo bi tena nêeşkeno îdame bikero".
Serdozgerîya Komare ya Îskenderûnî, emnîyetî rê nuşte şawit û persa gelo Güler "seba cimatî talûke" yo ya nê kerd. Qereqolê Polîsan ê Alîşanî yo ke qezaya Amedî Peyas (Kayapınar) de yo, ewro cewabê nuşteyê dozgerî da û pare kerd ke Güler "seba cimatî talûke nîyo".
Dozgerî, na agahîye ser o, seba veradayîşê Gülerî qerar da. Qerarê veradayîşî yê Gülerî resa hepisxane. Yeno pawitiş ke Güler do saetanê nêzdîyan de bêro veradayîş.
DERHEQÊ SIDDIK GÜLERÎ DE
Gülero ke lîsteya tepişteyanê nêweşan a giran a Komela Heqanê Merdiman (ÎHD) de ca gêno, serra 1994î ra nata tepişte yo. Gülerî rê sebebanê sîyasîyan ra cezaya hepisî ya muebede ameya dayîş. Nêweşîyê sey tansîyono berz, nêweşîya esteîyan, nêweşîya qelbî, nêweşîya damaran, romatîzmaya îltîhabî û Alzheimerî ey de estê. Güler, pabesteyê kursîyê bi tekelan heyatê xo domneno.