ZAZAKÎ NEWS - Dêrsim de duraxê otobusan de çenteyo bêwayîr o ke ame dîyayîş, hetê pisporê îmha yê bombayan ra bi fûnye ame teqnayîş û çente ra malzemeyê kirtasîyeyî vejîyayî.
Hedîse, şan de merkezê Dêrsimî de, Taxa Ataturkî de qewimîya.
Welatîyan, rayîrê Dêrsim-Xarpêtî ser de, duraxê otobusan de yew çenteyo bêwayîr ferq kerd û xebere da polîsan. Bi îhbarî ser o, polîsî, ekîbê weşîye û îtfîaye erşawîyayî cayê hedîse.
Ekîban, cade seba trafîkê wesayîtan û peyayan girewt û şerîtê asayîşî antî.
Bi ameyîşê pisporê îmha ê bombayan, welatîyê der û dorî rê agahdarî amey kerdene ke wa balkonanê keyeyanê xo de nêvinderê.
Dima ra çenta bi fünye bi kontrolî ame teqnayîş.
Çenta ra çîyê teqnayîşî ney, malzemeyê kirtasîyeyî vejîyayî. Badê qedîyayîşê cigêrayîşî rayîr newe ra trafîkî rê ame akerdiş.
