ZAZAKÎ NEWS - Qezaya Amedî Çêrmûge de Kemal Karabağ (18) seba ke bîrêka awe ya 15 metre xorîn kerdêne pak kewt waro. Wexto ke ey ra xebere nêameyî girewtene, Mehmet Karabağ (33), Mehmet Emîn Karabağ (35) û Hanîfî Yeşîlyaprak (38) zî kewtî bîr. Demêk ra dima, 4 datzayan ra zî xebere nêameye girewtene.
Bi îxbarê merdimanê înan ser o, ekîbê AFAD, weşîye, îtfaîye, cendirme û cigêrayîş û xelaskerdişî ameyî cayê hedîseyî. Ekîban, bi kindir û nêrdîwan kewtî bîr, tesbît kerd ke 4 kesî zî seba gazê karbonmonoksîtî yê ke çimeyê xo jenerator o, jehrî kewtê û merdê.
Bedenê bêganî yê 4 datzayan, ke bîrî ra ameyî vetene, seba otopsî şirawîyay Sazîya Tibbê Edlî ya Amedî.
Çêrmûge 4 kesî bîrê awe de merdî
— Zazakî News (@zazaki_news) September 30, 2025
Seba wendişê xebere û hîna zaf malumat🔽https://t.co/25mHg6qwJ2 pic.twitter.com/wKH7w5hC60
Badê kar û baranê Sazîya Tibbê Edlî, cenazeyê 4 datzayan seba ke bêrê definkerdene, şawîyay Camîya Hezretî Huseyînî ya qezaya Çêrmûge. Badê nimajê cenaze, cenazeyê datîzayan goristanê keyeyî de têkişte de ameyî definkerdene.
Ame vatene ke Mehmet Karabağ zewijîya û babîyê 4 gedeyan, Mehmet Emîn Karabağ babîyê 5 gedeyan û Hanîfî Yeşîlyaprak zî babîyê 2 gedeyan bî.
