Dêrsim de vera îdîayanê fuhuşî û çetebîyayîşî, cinîyî vejîyay kuçeyan. Zaf cinîyê ke Kuçeyê Hunerî de amey têlewe, bi şîarê "Fuhuş, çetebîyayîş û pûçbîyayîşî rê nê" rayîrşîyayîş organîze kerd.
Rayîrşîyayîşî ra dima Temsîlkara Haber-Senî Songul Yildize eşkerayîye wende. Yildize bale ante îdîayanê ke vanê bajar de fuhuş, çetebîyayîş û madeyê hîşberî zêde bîyê ser.
Yildize îzah kerd ke nifusê ciwanan bêkar o û cinîyî binê tedaya ekonomîkî û komelkî de yê. Yildize va: "Bêkarîye û zextê ekonomîkî, xusûsen cinîyanê ke tena ciwîyenê û paştdayîşê keyeyê înan kêmî yo, keno hedefê nê sîstemê tarîyan. Krîzê ekonomîkî yê ke xorîn beno, beno sebeb ke tayê cinîyî bikewê doma çeteyan. Îdîayê cîdî estê ke vanê 'bi rayîrê şîdet, tehdît û deynkerdişî' cinîyan zereyê na dame de tepişenê."
Yildize reaksîyon nîşanê îdîayanê ke çapemenîye de vejîyay da va:
"Zafê îdîayanê ke vanê 'cinîyî bi deynkerdiş û waadê karî yenê xapînayene û kaşê fuhuşî yenê kerdene' ma qerqilnenê. Xusûsen îdîayê ke vanê 'Tayê wezîfedarê kamuyî (dewlete) hêzê xo şuxilnenê û cinîyan kaşê fuhuşî kenê' ganî cade û bi şefafî bêrê cigêrayîş. Eger wezîfedarê ke no suc kerdê estê, ganî wezîfe ra bêrê girewtene û bêrê cezakerdene."