Adem Yıldîzo ke qezaya Sarıyerî ya Îstanbulî de esnaf o, da zanayîş ke seba ke kurd o, bi hawayêko sîstematîk bîyê hedefê hêrişanê nîjadperestan û 21ê Temmuze de zî teqriben hetê grûbêka esnafan a hewtay kesî ra rastê hêrişî ameyê.
Nuh û Abdurrahman Yıldîzo ke meydanê qezaya Sarıyerî ya Îstanbulî de dukanê înan ê pîlawî estbî, dima ke hêrişî ameyî kerdiş, ameyî berdene nêweşxaneyê Bajarî yê Prof. Dr. Cemil Taşcıoğlu.
Goreyê xabera Ajansê Mezopotamya, 14ê Temmuze de Adem Yıldîz, minaqeşeyo ke mîyanê esnafan de bî de, hetê polîsanê ke ameybî cayê hedîse ra ame destbendkerdiş û dima ke şeş rojî derbaz bî serbest ame veradayîş.
"Ma dukan akerd nêakerd ameyî ma ser"
Nuh Yıldîzî va: "21ê Temmuze de terefê bînî waşt ke ma reyde îrtîbat rono. vatî: 'Hedîseyêko nêweş qewmîya. Ma nêwazenî hedîse hîra bo. Ma esnaf î, embaz î. Bêrî ma ronîşî û pîya pêbike.' Ma hîrê kesî şîyî seba qiseykerdişî. Eke îcab bikerdêne, ma do helalî zî bîwaştêne. La, ma dukan akerd nêakerd, eşte ma ser. Tabelaya dukanê ma şikitî. Tewr verî da xalê mi Abdurrahman Yıldîzî ro, rîyê xalê mi de platin esto. Seba ke hîna zaf nêdê piro, ma cewab nêda û ma waşt ke xo bipawe."
