ZAZAKÎ NEWS - Dêrsim de seba pawitişê Kirmanckî (Zazakî) vengdayîşê seferberîye ame kerdene. Prosesê weçînayîşê dersanê weçînayeyan ê seba serra perwerde û musnayîşî ya 2026-2027î yê mektebanê resmîyan, 20ê Sibate (Gucige) de qedîyeno.
Beşê Ziwan û Edebîyatê Zazakî yê Zanîngeha Munzurî û Şaxa Dêrsimî ya Sendîkaya Kedkaranê Perwerde û Zanistî (Egîtîm Sen), veng da may û pîyan ke seba domananê xo dersa Zazakî - Kirmanckî biweçînê.
Beşê Ziwan û Edebîyatê Zazakî ke serra 2012î de Zanîngeha Munzurî de amebi akerdene, serranê verênan de eleqeyêko zêde dîyêne. Labelê dima pandemî hûmara wendekaran kêmî bîye.
"Motîvasyonê wendekaran kêmî bîyo"
Serekê Beşê Ziwan û Edebîyatê Zazakî Doç. Dr. Îlyas Arslanî bale ante kêmîbîyayîşê eleqeyî ser û wina va:
"Verê cû eleqe zaf zêde bi. Bajaranê dormeyî ra xeylê wendekarî ameyêne. Dima pandemî kêmî bi. Reyna semedo ke Wezaretê Perwerdeyî kêmî mamostayan gêno û serrane tena mamostayêk yan zî di mamostayan tayîn keno, motîvasyonê wendekaran keweno waro; no zî beno sebebê kêmîbîyayîşî.
Hetê bînî ra, hema zî zanîngehe de kêmasîya akademîsyenan esta. Tayê şert û mercî estê, eke ê bêrê caardene kêmasîya xebatkaran tîya zî eşkena bêra çareserkerdene. Ma wazenê ke cîwanê ma bêrê û ma na xebate bidomnê. Îmkanê ma yê başî estê.”
"Nika mamostayî estê, ganî derse bêra weçînayene"
Mamostayê Beşê Ziwan û Edebîyatê Kurmanckî Hidir Sonmezî zî rasterast veng da may û pîyan û va:
"Ma wazenê Dêrsim de kamcîn mekteb beno wa bibo, wendekarê ma dersa Zazakî biweçînê. Verê cû şarî vatêne mamostayî çin ê, nê dersî çin ê; la nika mamostayî estê. Semedê ney ra ganî na derse bêra weçînayene.
"Hûmara sinifan kêmî bîya"
Dêrsim de hûmara sinifan (polan) ê dersanê weçînayeyan ê Kirmanckî (Zazakî) serranê vîyarteyan de 12 bîye la nê serranê peyênan de kewta 5.
Rayberê Şaxa Dêrsimî ya Egîtîm Senî Sînan Çîçekî îfade kerd ke eke hûmara mamostayan zêde bibo, weçînayîşê dersan zî do zêde bibo û wina dewam kerd:
"Verê cû mamostayî zaf kêmî bîy. Qezayan de zî qet mamostayî çin ê. La eke mamostayî bêrê, rewşa weçînayîşê na derse do başêr biba. Çend mektebanê ma de sinifî ameyî akerdene. Mektebanê ma de 5 sinifê ma estê. La ma ney kêmî vînenê. Hûmara sinifan çiqas zêde biba, do goreyê aye mamostayî zî bêrê û xebatî do hîna zaf bibê."
