Îzmîr de, sermayedar Rahmî Koç o ke tewrê akerdişê nêweşxaneyî bibî, hîkayeya ey ya ke cinîyanê kurdan nizm nawnena, bîy sebebê hêrsêko pîl. Vizêr Îstanbul û Antalya de zî verê galerîya Otokoçî ya ke ya Grûba Koçî ya, hêrîşê bi sîlahî ameyî kerdiş.
Dîyarbekir de zî hêrîş
Îstanbul û Antalya ra dima, xeberêka hêrîşî ya bîne zî Dîyarbekir ra amey.
Goreyê malumatan; hedîse vizêr şew dorûverê saete 23.30î de qezaya Sûrî ya Dîyarbekirî de qewmîya. Kes yan zî kesanê ke nasnameyê înan nêbellî, verê şubeyê Bankaya Yapı Kredî de ke ya Grûba Koçî ya, hêrîşê bi çek kerd.
Gurekaranê bankayî serê sibayî de gama ke şubeyê bankayî akerd, caman de hernê fîşengan dîyî û xeber da ekîbanê polîsan. Ekîbê Mudurîya Asayîşî ya Dîyarbekirî verê bankayî cigêrayîş kerdî. Seba cigêrayîşî ekîban Cadeyê Gazî trafîkî rê girewt. Şubeyê banka cuwa pey ame qefilnayîş û nuşteyê “Şubeyê ma nêşeno xizmet bido, şima eşkenî şubeyanê bînan ra paştgîrî bîgîrê” ame daliqnayîş.
Fîkraya “cinîyanê kurdan” ya ke sermayedar Rahmî Koçî wextê akerdişê nêweşxaneyî yê Îzmîrî de vatbî, bibî sebebê reaksîyonêko pîl û derheqê ey de zî tehqîqat ame destpêkerdiş.