ZAZAKÎ NEWS - Herêma Masîsî ya Eyaletê Vakur-Kîvuyî ya Cumhurîyetê Demokratîkî yê Kongoyî de, madenêkê koltanî de rijnayîş ame meydan. Goreyê malumatanê verênan, tewr tay 226 karkerî weşîya xo vîndî kerd.
Bajarê Rubaya de çend rojî yo ke varanêko zêde vareno. Wextê varanî de karkerê ke çalikanê binê erdî yê madenî de xebitîyêne, netîceya rijnayîşî de binê herre de mendî.
Karkerê ke bi birîndarî ameyî xelesnayene, dima mudaxeleyê lezgînî wedarîyay merkezanê weşîye yê Goma.
Bêkontrolîye bî sebebê felaketî
Ame vatiş ke xebatê cigêrayîş û xelesnayîşî yê herême, semedê zorîya resayîşî û xebitîyayîşê bêserûberî yê madenan, zaf giran aver şonê. Pisporî vanê, fealîyetê madenî yê Masîsî de kontrol çin o û tedbîrê asayîşî kêmî yê, coka qezayê winasî zaf benê û nê îhmalî benê sebebê felaketan.
Aşma Hezîrana 2025î de zî eynî herême de, rijnayîşêkê bînî yê madenî de 17 karkeran weşîya xo vîndî kerdbî.