ZAZAKÎ NEWS - Rojnamegerê Bêsinorî (RSF) û Komîteya Pawitişê Rojnamegeran (CPJ), bîlançoya serra 2025î pare kerde. Goreyê raporî, şîdetê vera rojnamegeran dinya de zêde bîyo û tewr zaf vîndîbîyayîşê canî Rojhelatê Mîyanênî de ameyo meydan.
Dîrektorê Pêroyî yê RSFyî Thibaut Bruttinî îzah kerd ke kiştişê rojnamegeran dinya de reyna zêde bîyo û va, "No hal mojneno ke ma babeta vernîgirewtişê şîdetê vera rojnamegeran de ser nêkewtê."
Goreyê raporo ke hetê Komîteya Pawitişê Rojnamegeran (CPJ) ra ame weşanayîş, serra 2025î de seranserê dinya de 129 rojnamegerî û xebatkarê medya ameyê kiştiş.
Eynî dem de 330 rojnamegerî zî erziyayê hepisxane.
Vilabîyayîşê mergan goreyê herêman wina yo:
Asya: 104 xebatkarê medya (94ê ci têna Rojhelatê Mîyanênî de yê)
Afrîka: 11 xebatkarê medya
Amerîkaya Vakurî: 9 xebatkarê medya
Amerîkaya Başûrî: 4 xebatkarê medya
Goreyê raporî, qitaya Asya de 104 mergî qewimîyayê, la bi taybetî Rojhelatê Mîyanênî bi 94 mergan bîyo herêma tewr tehlukeyine ya seba rojnamegeran.
"Rojnamegerî bi zanebîyayîş yenê hedefgirewtene"
Dîrektorê Pêroyî yê RSFyî Thibaut Bruttinî îzah kerd ke rojnamegerî tesadufî ney, bi awayêko zanebîyaye yenê hedefgirewtiş.
Bruttinî va, "Nê însanî têna semedo ke wezîfeyê xo kenê, canê xo ra benê. Rojnamegerî êdî bîyê qerê bazirganîye yan zî pîyonê kayê dîplomasîye; ê rasterast yenê hedefgirewtiş."
RSFyî va ke serra 2025î de 135 rojnamegerî vîndî bîyê û 20 rojnamegerî zî hema zî sey rehîne yenê tepiştiş.
