ANALÎZ
Festîvala Kultur û Xoza ya Munzurî Dêrsim de vizêr dest pêkerd. Semedê festîvale, aktîvîteyî cîya bi cîyayî yenê kerdiş. Her çiqas roja verêne çend qalê Kirmanckî (Zazakî) ameyê vatene zî ziwanê festîvale çi heyf ke Tirkî yo.
Ewro rewra ferîbot de bi nameyê “Sudan Gelen Tarih” zîyafetê şîîran ame dayene.
Çend şaîrî û nuştoxî bi nameyê Haydar Ünal, Nesimi Aday, Okay Tekin, Oya Gündüz Aksu, Ömer Öneren, Övünç Ezgi Yılmaz, Sami Aydoğan û Vedat Aldemir şîîrî wendî. La nê şîîrî bi ziwanê Tirkî ameyî wendene. Nê kesî pêro zî belkî zonê xo zanenê la zonê înan (Kirmenckî) nêame vîrê înan.
Kesê ke ferîbot de bî zî zonê înan xemê înan de nêbi û bi şîîranê Tirkî zaf keyfweş bîyê. Şarê Dêrsimî Kirmanc (Zaza) yo û Dêrsîm semedo ke ziwan û kulturê xo mihafeze biko bi serrano ke micadele dano. La çi heyf ke Festîvalanê serranê peyênan de zonê ma Kirmanckî (Zazakî) teşwîq nêbeno û Tirkî yanê ziwanê serdestanê ma yeno ferzkerdiş.
Zazakî News
