Parlamenterê Amedî yê AK Partî Galîp Ensariogluyî, programêkê televîzyonî yê ÎLKE TVyî de derheqê prosesê çareserîye de fikrê xo ardî ziwan û vat ke hêvîya ey esta Selahattîn Demîrtaş serbest bo.
Ensariogluyî, derheqê veradayîşê Selahattîn Demîrtaşî ke serra 2016î ra nat Zindanê Edîrne de tepişte yo, wina va:
“Verî, wextê prosesanê ke bi şer û mergî zêde bîy, huqûq zî binê tesîrê ê atmosferî de bi. Nika ez bawer kena ke derheqê Demîrtaşî de goreyê na rewşa newîye ra yew qerar do bêro girewtiş.”
Parlamenterê AK Partî îşaret kerd ke proses hetêko pozîtîf ser şono û wina dewam kerd:
“Dima ke îradeyê her di hetan eşkera bi, do gamê dihetî bêrê eştiş. Di meseleyî estê ke pêro Kurdî înan ser o hemfikir ê; tarîfê welatîbîyayîşî û perwerdeyê bi ziwanê dayîke. Tarîfê welatîbîyayîşî, tena welatîyêk nê, nasnameyêko neteweyî tarîf keno.”
Ensariogluyî, derheqê şîyayîşê heyetêkê Komîsyonî seba pêvînayîşê bi Abdullah Ocalanî de zî nê çîyî vatî:
“Ocalan bi xo wazeno û vano, wa komîsyon bêro û mi bivîno. Şîyayîşê Îmraliyî meseleyêka hesas a la eke Komîsyon şêro, do bi îradeyê xo şêro.”
