Rêxistina Weşîye ya Dinya (RWD), raporê xo yo newe weşana û eşkera kerd ke pêro dinya de nezdîya hîrê ra yewê cinîyan maruzê şîdetê partnerî yan zî şîdetê cînsîyî maneno.
Dîrektorê Pêroyî yê RWDyî Tedros Adhanom Ghebreyesusî, eşkerayîya xo ya vizêrêne de va ke şîdetê serê cinîyan "bêedaletîyanê merdimîye ra yew o"
Goreyê malumatanê raporî:
Pêro dinya de nezdîya 840 mîlyon cinîyî (her hîrê cinîyan ra yewe), cuyayîşê xo de maruzê şîdetê partnerî yan zî şîdetê cînsîyî mendê.
Serra 2024î de, %11ê cinîyan ê 15 serre û pîlêran (nezdiya 316 mîlyon cinîyî) hetê partneranê xo ra maruzê şîdetê fîzîkî yan zî cînsîyî mendê.
Vîst serranê peyênan de, şîdetê partnerî de serrane tena %0,2 oran de kêmîbîyayîş ameyo qeydkerdene.
Şîdetê cînsî yê teberê partnerî
Rapor de malumatê şîdetê cînsî yê ke hetê kesanê teberê partnerî ra yenê kerdene zî estê. Goreyê ney, 263 mîlyon cinîyan, 15 serrîya xo ra nat hetê kesanê ke partnerê înan nîyê ra maruzê şîdetê cînsîyî mendê. RWD da zanayene ke semedê şerm û terse ra xeylê hedîseyî meqamanê resmîyan rê nênê vatene.
Fonan de kêmîbîyayîş
Bale ameye antene ser ke butçeyê ke seba programanê vera şîdetî ameyê cîyakerdene, kêmî bîyê.
Kênekeyê cîwanî û rîskê zêdebîyayeyî
Serra peyêne de, %16ê kênayanê 15-19 serrîyan (12,5 mîlyon), maruzê şîdetê partnerî mendê. Ame vatene ke krîzê îklîmî, pêrodayîşî û feqîrîye seba cinî û kênayan rîskê şîdetî zêdnenê.
Ferqê mabênê herêman
Goreyê raporî, oranê şîdetî mabênê herêman de ferqê pîlî musnenê:
- Okyanûsya (Awustralya û Zelandaya Newîye teber de): %38
- Asyaya Başûrî: %19
- Afrîka: %14–17
- Ewropa û Amerîkaya Vakurî: %5
- Amerîkaya Latîne û Karayîb: %7
