Vizêr 17ê Gulanê dewaya Kobanî de qeraro pêyên ame aşkerekerdiş.
Sîyasetmedare Gultan Kişanak zî hewt serrî bi ke rîyê dewaya Kobanî ra hepisxane de bî. Kişanake vizêr serbest ameybî veradayîş.
Sereka Şaredarîya Bajarê Girdî ya Amedî Gultan Kişanak no 7 serrî û 6 aşmî yo ke hepisxaneyê Kandira yê Kocaelî de bî. Hukmatê Ak Partî herdinda aye de qeyûm tayînê Şaredarîya Amedî kerdbî.
Kişanake ke hepisxane ra vejîya pê teyara amey Amed û Teyaragehê Amedî de Hemserekê Şaredarîya Bajarê Girdî ya Amedî Serra Bucak û Dogan Hatun, Hemserekê Şaredarîya Bajarê Girdî ya Mêrdînî Ahmet Turk û Devrîm Demîr, aktîvîstê Tevgera Jinen Azad (TJA), rayberê DBP û DEM Partî şîy a vera.
“Yew hetê ma hepisxane de mend ”
Gultan Kişanak Teyarageh de qiseykerdişêko kilm kerd û va: “Çi heyf ke ma kêm ameyê. Heta ke pêro hevalê ma hepisxane de ra nêvejê ma zî azad nîy'ê. Kobanî pergirêka wijdanî ya. Înan dewaya Kobanî sey kompasêk ard ma vera. No micadele de wicdan serkewt, senî ke Kobanî serkewt.”
Gultan Kişanak badê cû şîy awanîya DEM Partî ya Amedî zîyaret kerd.
Ayla Akat Ata û cinîyê qismêk cinîyê bînî zî vejîyayê
Heto bîn ra Sebahate Tuncel, Ayşe Yagci, Meryeme Adibelli, Ayla Akat Ata ê ke Hepisxaneyê Sincanî de bîy zî ameyê veradayîş. Cinî hetê TJA, MEBYA-DER, DEM Partî,DBP û OHDyî ra bi slogananê Jin jîyan azadî”, “Bijî berxwedana zindanan” ameyî pêwazîkerdiş.
Ayla Akat Ata vat: ''Sîyaset metodê çareserkerdişê meseleyan yo. Ewro seba ke ma zîndanî ra vejîyayî ganî ma nêşarmîyêne la ma şarmîyayî. Seba ke ma embazê xo, xo dima verdayî ma şarmîyayî. Înanê ke huqûq nêard ca ganî ê bişarmîyayêne la ma şarmîyayî. Ê ke bîyî sebebê şarmîyayîşê ma eslê xo de ê sûcdar ê.''
