Sakikî îzah kerd ke, wexto ke mesele bena Kurdî, heme hetî benê yew û va: "Zanîyeno ke Başûrê Kurdistanî de bi desan qereqolê Tirkîya estê û balyozê înan bi ale û tîmanê taybetan gêreno, razînêbîyayîşê vera Pêşmergeyan raşt nîyo."
Sirri Sakikî qiseykerdişê xo de wina va: "Çend rojî yo Kurdî bi matmende ewnîyenê munaqeşeyê şima ra. Seba 2 Pêşmergeyan ke Alaya Kurdistanî milê înan de bîye û a alaye hetê Tirkîya û dinya ra bi hawayêko fermî yena şinasnayîş, şima heme amey têhet û şima qiyamet wedarna."
"Balyozê şima bi çekanê giranan gêreno"
Sakikî bale ante Başûrê Kurdistanî ser û va: "Başûrê Kurdistanî de bi desan qereqolê Tirkîya estê. Uca kontrolê nasnameyan yeno kerdiş û kontroleko xurt esto. Balyozê Tirkîya uca de, ne bi hêzanê asayîşî yê herême, la bi hêzanê asayîşî yê Tirkîya, bi tîmanê taybetan û çekanê giranan gêreno. Qet çîyêk zî nêbeno."
Sakikî qiseykerdişê xo wina qedîna: "Ma qey heqê serwerîye yê nê welatî esto la yê şarê bînî çin o? Şima pratîkê serdest û bindestan anê ca. Ma nê çîyan red kenê."