Serekê Pêroyî yê CHPî Ozgur Ozel o ke bi qerarê ‘Butlano qetî’ wezîfe ra amebî girewtene, vizêrî eşkera kerdbî ke do kombîyayîşê grûbe yê partîya xo de qisey bikero. Eynî wext de Kemal Kiliçdaroglu yo ke biqerarê mehkema sey Serekê Pêroyî yê CHP’yî amebî wezîfedar kerdene zî qerar dabî ke do kombîyayîşî virazo.
Naye ser o verê berê Meclîsî de têmîyankewtiş vejîya û mabênê hetgiranê Kemal Kiliçdaroglu û Ozgur Ozelî de tengijîyayîş qewimîya. Wexto ke krîz dewam kerdêne Kemal Kiliçdaroglu qerar da ke beşdarê kombîyayîşî nêbeno û saetanê vernî de do Merkezê Pêroyî yê CHP’yî de eşkerayîyêka nuştekî bido.
Reyna Serekê Meclîsî Numan Kurtulmuşî zî Kemal Kiliçdaroglu rê nuşteyêk şirawit û diyar kerd ke ê bi mazaretê “Asayîşî” seba kombîyayîşê CHP’yî zîyaretê welatijan qebul nêkenê, do destûr nêdîyo welatijî tewrê kombîyayîşê grûbe bibê.
