Hozananê şarê ma ra yewna mîyanê ma ra bar kerd û şi!.
Ewro pêhesîya ke hozano Gimgimij Xidirê Başî (Hıdır Çelik) Îstanbul de şîyo heqîya xo ser.
Xidirê Başî serra 1955î de dewa Gimgimî Muskan (Beşikkaya) de amebi dinya.
Xidirê Başî ziwanê ma de hem şîîrî nuştêne, hem kilamî vatêne û hem zî şîîrê xo bi vengê xo wendêne û vila kerdêne.
Xidirê Başî xeylê wext estbi ke nêweşîya xo ver amêne dermankerdiş û nê demanê peyênan de amelîyat bibi.
La çi heyf ke nêeşka nêweşîye ra xelisîyo û ewro dinyaya xo vurîna.
Ewro semedê ey Îstanbul de Cemxaneyê Gazî de merasîmê oxirkerdişî virazîya û meyîtê ey semedê heqkerdişî erşawîya welatê ey Gimgimî.
Jû şîîra Xidir başî
Sumbula mi
Kaşkena cor de ana gûçikê çîte
Nêbeno Sumbula mi nêbeno, zê/je/sey to nêbeno
Ti nêosnena mi sirot a hîte
Nêbeno Sumbula mi nêbeno, zê to nêbeno
Yare to vîneno ez duşê xo ra, Kenger nêdana mi ti pêşê xo ra
Qey mahrûm verdana mi neşê xo ra
Nêbeno Sumbula mi nêbeno, zê to nêbeno
Ez qewil nêkeno, ti cêna qerar
Mi ra hes nêkena, dana mi zerar
Bê to nêvindeno, ez beno fîrar
Nêbeno Sumbula mi nêbeno, zê to nêbeno
Serê şenê şîsî gul û nebat o
Sebrê mi nêmendo, ez bê tevat o
Bê to nêvindeno, Xidir seba/serba to
Nêbeno Sumbula mi nêbeno, zê to nêbeno
