ZAZAKÎ NEWS - Komela Heqanê Merdiman (ÎHD), bi yew eşkerayîya nuştekîye, astengkerdişê qiseykerdişê bi Kurdkî yê Mayanê Aştîye yo ke Komîsyonê Meclîsî de virazîya, şermezar kerd. ÎHDyî veng da Serekîya Meclîsî ke wa Mayanê Aştîye û heme welatîyanê ke ziwanê înan o dayîke Kurdkî yo, înan ra uzrê xo biwazo.
Vizêr, 5. kombîyayîşê Komîsyonê Hemkarîya Mîlî, Birayetî û Demokrasî bi serekîya Serekê Meclîsî Numan Kurtulmuşî de virazîya. Kombîyayîş de, bi nameyê Mayanê Aştîye, Nezahat Teke, Rabia Kiran û Turkiye Bozkurt ameyî goştarîkerdiş. Labelê, waştişê qiseykerdişê bi Kurdkî yê Nezahat Teke û Rebia Kirane hetê Numan Kurtulmuşî ra nêame qebulkerdiş.
Eşkerayîya nuştekîye ya ÎHDyî wina ya:
“Komîsyono ke çarçewaya prosesê neweyî de, bi armancê ke persa Kurdan bi rayîrê aştî û demokratîkan çareser bikero Meclîs de ronîyayo, kombîyayîşanê xo yê bi kes û sazîyanê cîyayan domneno.
Nezahat Teke û Rabîa Kiran, bi nameyê Mayanê Aştîye beşdarê kombîyayîşê ke vizêr virazîya, bîyî. Labelê, astengkerdişê waştişanê Teke û Kirane yê bi Kurdkî, ke ziwanê înan o dayîke yo, nêno qebûlkerdiş.
Qedexekerdişê ey ke merdim xo bi ziwanê xo yê dayîke îfade bikero, verê her çîyî vera xala 42. ya Qanûnê Bingeyênî yê Komara Tirkiya yo..
Yew qonaxêko wina krîtîk de nêno qebulkerdiş ke Mayanê Aştîye dejanê xo bi ziwanê xo bîyarê ziwan û seba naye bêrê astengkerdiş. Ma sey pawitoxê heqan bi serran o tekoşînê xo yê seba ziwanê dayîke domnenî û sey dewamê nê tekoşînî; ma astengkerdişê qiseykerdişê bi Kurdkî yê Nezahat Teke û Rabia Kirane Meclîs de şermezar kenî.
Seba ney, ma veng danî Serekîya Meclîsî ke wa Mayanê Aştîye û heme welatîyanê ke ziwanê înan o dayîke Kurdkî yo, înan ra uzrê xo biwazo.
Azadîya qiseykerdiş û îfadekerdişî ya bi ziwanê dayîke nêna astengkerdiş!”