Hetê Mufetîşanê Mulkîye yê Wezaretê Karanê Zereyî ra, cigêrayîşê derheqê Şaredarîya Dêrsimî de Fatih Mehmet Maçogluyî rê bi bahaneya ke wezîfeyê xo de 145 kesî bêusul girewtê kar û bi no sebeb zerar dayo kamuyî, 86 mîlyon û 620 hezar lîra ceza amey birnayîş. Derheqê Maçogluyî de Serekdozgerîya Komare ya Dêrsimî rê gerre ame kerdene.
Cigêrayîşo ke hetê Mufetîşanê Mulkîye yê Wezaretê Karanê Zereyî ra Şaredarîya Dêrsimî de Kanûnê serra vîyarteyî de dest pêkerdbî, peynîya aşma Hezîrane de qedîya. Cigêrayîş de ame tesbîtkerdene ke, prosesê serekîya Fatih Mehmet Maçogluyî de 145 karkerî bêusul gêrîyayê kar, mesrefê karkeran resayo %84ê ameyeyê şaredarîye û semedê ney ra kamu zerar dîyo. Nê ser o Mufetîşanê Mulkîye, Maçogluyî rê 86 mîlyon û 620 hezar lîra zîmet vet.
Fatih Mehmet Maçogluyî bi yew dîlekeyî muracatê Şaredarîya Dêrsimî kerd û îtîraz kerd. Îtîrazê Maçogluyî, hetê Wekîlê Serekê Şaredarîye Şefîk Aygolî ra red bi.
ÎŞKURî zî ceza birnabî
Mudurîya Îşkurî ya Wîlayetî zî cigêrayîşê xo de tesbît kerdo ke Şaredarîya Dêrsimî mabênê serranê 2019 û 2024î de 145 karkerî bêîlan girewtê kar û semedê ney ra şîrketê şaredarîye rê demanê cîyayan de pêro pîya nezdîya 500 hezar lîrayan ceza birnaya. Şaredarîye, seba îtîrazê cezaya birnaye muracatê mehkeme kerd. Dadgerîya Cezaya Sulhî ya Dêrsimî, muracat red kerd.
