Serekê Pêroyî yê Partîya Hereketê Neteweperwerî (MHP) Devlet Bahçelîyî, kombîyayîşê grûba partîya xo yê Parlamentoyê Tirkîya de qisey kerd.
Bahçelîyî derheqê prosesê aştîye de va, "Eke kes nêşêro, ez do hîrê embazanê xo pîya bigîrî û şêrî Îmralî."
"Ez do şêrî Îmrali"
Devlet Bahçelîyî bale ante serê prosesê aştîye û va, "Komîsyon ameyo merheleyê peyênî. Dima ra beno ke heyeto ke do şêro Îmrali zî bêro dîyarkerdiş." Serekê MHPî da zanayîş ke eke kes cesaret nêkero şêro Îmrali, o amade yo ke bi hîrê embazanê xo reyde şêro.
Bahçelîyî îfade kerd ke o amade yo rî bi rî Serekê PKKyî Abdullah Ocalanî reyde pêvînayîş bikero û wina va: "Çîyo ke ez do vajî, ez do bi camêrdî û bi îtimadî ewnîya çimanê muxtabê xo ra û vajî.”
Devlet Bahçelîyî bale ante serê prosesê aştîye û Komîsyonê Yewîya Neteweyîye, Brayîye û Demokrasîye ke ewro do kom bibo. Komîsyon do ewro goş bido Wezîrê Karanê Zereyî Alî Yerlîkayayî, Wezîrê Pawitişî Yaşar Gulerî û Serekê Teşkîlatê Îstîxbaratî (MİT) Îbrahîm Kalinî.
Bahçelîyî da zanayene ke ganî êdî munaqeşeyê şîyayîşê Îmraliyî biqedîyê û heyetêk bêro aşkerekerdiş.
“Ez şîyayîşê Îmraliyî ra nêtersaya”
Serekê MHPî dîyar kerd ke eke armanc awankerdişê 'Tirkîyayêko Bêteror' o, astengkerdişê şîyayîşê Îmraliyî bêmana yo û wina pers kerd: "Eke bi muxtabê serekî yê prosesî ra têkilîya rasteraste nêrona, netîce do senî bêro girewtene û averşîyayîş do senî bibo?"
Bahçelîyî ard ziwan ke armancê prosesî, 100 serranê peyênan de firsendanê tewr muhîm û tarîxîyan ra yew o û va ke bi nê hawayî do “çarenuşteyê xirab yê welatî” bivurîyo û planê ke Tirkîya ser o yê, do pûç bibê.
