Dêrsim de hîrê kesanê ke ameyê tesbîtkerdene ke sîrê koyî yê endemîk yê Dêrsimî yo ke binê pawitişî de yo bê îzin top kerdê, pêro pîya 2 mîlyon û 97 hezar û 735 lîrayî cezaya pereyî ya îdarî ameya birnayîş.
Sîrê koyî yê Dêrsimî yo ke nameyê ci yo zanistî “Allium tuncelianum” o û dinya de bi awayêko tebîî tena na mintiqa de vejîyeno; Parka Millî yê Gelîyê Munzurî, Koyanê Munzurî û cayê berzî yê dormeyê înan de reseno.
Dîma îhbarê topkerdişê bê îzin yê sîrê koyî yê Dêrsimî, ekîbê jandarma û Pawitişê Tebîatî û Parkanê Millî (DKMP) Gelîyê Ahpanosî de dest bi xebate kerd.
Xebata cigêrayîşî de plakaya wesayîto ke şuxulnaybî ame tesbîtkerdene. Wesayît, sînoranê Parkê Millî yê Gelîyê Munzurî de, Qereqolê Karşılarî de ame vindarnayîş.
Cigêrayîşê mîyanê wesayîtî de mîyanê toreyêk de 20 kîlogram sîrê koyî yê Dêrsimî ame vênayîş. Seba hîrê kesanê ke ameyê tesbîtkerdene ke vaşê binê pawitişî de yê bê îzin arê dabî, muameleyo qanûnî ame kerdene. Goreyê qanûnan, seba nê hîrê kesan pêro pîya 2 mîlyon û 97 hezar û 735 lîrayî cezaya pereyî ya îdarî ame birnayîş.
