Komxebate 3ê êlule dest pêkerd û ewro qedîya. Nêzdîyê 30 akademîsyen, cigêrayox, nuştox û ziwannasan 3 rojî 600 ra zêdêr çeku û terman ser o minaqeşe kerd. Beşdaran ê çekuyan ser o xebitîyayî û kerdî mîyanê ferhengê Zazakî. Sebebê nê xebatan standardîzekerdişê zazakîbi û wa hunermendî ci ra îstîfade bikê û zazakî rast bixebitnê.
Komxebate hetê Şubeya Pawitiş û Averberdişê Ziwanî ya Şaredarîya Bajarê Girdî ya Dîyarbekirî ra ame viraştene. Qerar o yo ke seba huner û muzîkê zazakî termînolojî û çimeyêko muşterek bêro meydan.
Mamosteyê Unîversîteya Mêrdîn Artukluyî Doç. Dr. Nureddîn Celalî muhîmîya na game ser o wina va: "Şima zanê zazayan-Kirdan welatê xo ra bar kerd metropolan. Semedê naye ra çimeyanê xo yê cematkîyan zî kerd vîndî. Ma wazenê seba înan çimeyêk virazê ke her kes ey ra îstîfade biko û gama ke hunerê xo pêşkêş kenê, bi hewayêko rast bixebitê."
600 ra vêşêr çekuyî û termî ameyî ercnayene
Beşdaranê komxebate 600 ra vêşêr term û çekuyê ke mintiqayanê cîya-cîyayan de bi formê cîyayan yenê xebitnayene ercna û bi qerarêko hempar resayî netîceyêk.
Ziwannas Seyîdxan Kurijî eleqe ant termanê ke yenê xebitnayene ser û va: "A termînolojîya ke nika heme hunermendî xebitnenê pêro zazakî nîya. Ma xebat kenê ke seba termînolojîya ke wareyê hunerî de yena xebitnayene, kirmanckîya-zazakî înan bivînê û qeyd bikê."
Ziwannas Mehmet Selîm Uzunî zî îfade kerd ke ziwanê hunermendan kewto binê tesîrê ziwananê bînan û va: "Tayê hunermendî binê tesîrê tirkî de yê, tayê binê tesîrê îngilizkî de yê, tayê binê tesîrê almankî de yê û tayê zî binê tesîrê erebkî û fariskî de yê ke no wîna nêbeno. Ma wazenê ke termanê muşterekan virazê seba ke heme hunermendê kurdî nê terman bixebitnê."
Zazakî ver bi standardbîyayîşî şona
Goreyê ziwannasanê Grûba Vateyî, bi nê xebatan Zazakî game bi game do bireso yew standard. Heto bîn ra ferhengê ke yenê amadekerdene, do seba heme eleqedaranê zazakî bibê rayber û raymotox.
