Amedsporî, hefteyê 7. yê Lîga Yewine yê Trendyolî de, keyeyê xo de Sariyer kerd mêman û bi golanê ke nîmeyê diyînî de eştî 2-0 serkewt.
Nîmeyo yewin ê maçî 0-0 bi pîyakî qedîya. Deqîqeya 19. de Fernandoyê Amedsporî semedê seqetbîyayîşî ra kay ra vejîya û Felix kewt cayê ey.
Amedsporî bi hawayêko qewetîn dest bi nîmeyê diyînî kerd û zextê xo serê Sariyerî de zêde kerd. Deqîqeya 46. de Dia Sabayî gol eşt la semedê ofsaydî ra nêame qebulkerdiş. Zextê Amedsporî deqîqeya 60. de zî dewam kerd û topa ke Diagneyî bi sereyê xo da piro, qela ra ageyra.
Golî pêser ameyî
Zextê Amedsporî deqîqeya 78. de netîce da. Murat Uçarî pas da Mehmet Yeşîlî û ey zî bi yew şutêko qewetîn taximê xo 1-0 aver vist.
Deqîqeyanê zêdekerdeyan de, yanî deqîqeya 90+6 de, Mbaye Diagneyî gola peyêne eşte û netîceyê maçî bewlî bi 2-0.
Bi nê serkewtişî, Amedsporî pûanê xo vetî 13 û lîge de vejîya rêza 4. Sariyer zî 1 pûan de mend.