ZAZAKÎ NEWS – Kovara kulturî Vateyî hûmara xo ya 38ine (Wisar 2012) de, bi nuşteyêko taybet ê J. Îhsan Esparî, derheqê mergê Şêx Evdirehîmî û embazanê ey de yew babeta tarîxîye ya muhîme ser o malumatê neweyî weşanayî.
Hûmara 38ine ya Kovara Vateyî de ca dîyabi yew cigêrayîşêko muhîm. Na hûmare de nuşteyo ke tewr zaf bale anceno, nuşteyê cigêrayox, şaîr û nuştox J. Îhsan Esparî yo bi nameyê “Kurdê ke 1937 de Seba Hewara Dêrsimî Vejîyaybi û Kişîyaybi: ŞÊX EVDIREHÎM Û EMBAZÊ EY” yo.
Espar, nê nuşteyê xo yê cigêrayîşî de, qala birayê Şêx Seîdî, Şêx Evdirehîmî û embazanê ey keno. Goreyê nuşteyî, Şêx Evdirehîm û embazê ey serra 1937î de wexto ke Dêrsim de tertele dewam keno, seba ke ardimê şarê Dêrsimî bikerê, ‘Binê Xete’ ra derbazê ‘Serê Xete’ benê la hetê eskeranê dewlete ra yenê kiştiş.
Bi nê nuşteyî, tarîxê ma yê nêzdîyî ra yew rîpelêko bîn yo tarî, roştî beno û xeylê malumatê ke heta nika nêzanîyenê, vejîyenê meydan.
Kovare de, teberê nê nuşteyî de, derheqê “Folklor û Bawerîya Kurdanê Dêrsimî” de nuşteyê Munzur Çemî û nuşteyêko bîn bi nameyê “Derheqê Kirmanckî de Kombîyayîşê Vistîne” zî ca gênê.
