Temsîlkarê Amedî Amedspor o ke çend rojî verê cû Mehmet Altiparmak erşawit, teknîk dîrektorê xo yo newe eşkera kerd.
Yew Dêrsimijî Amedspor de
Eşkerayîya ke klûbe ra amey dayene de wîna ame vatene: “Seba wezîfeyê teknîk dîrektorîye yê Taxîmê ma yê Futbolî Sînan Kalogluyî reyde peyman ameyo îmzakerdiş. Ma teknîk dîrektorê xo yo newe Sînan Kalogluyî rê vanê ti xeyr ameyî klûba ma; Ma ey rê û ekîbê ey rê serkewtiş wazenê.”
Sînan Kaloğlu kam o?
Sînan Kaloğlu, serra 1981î de qezaya Dêrsimî Pulur de ame dinya. Dewrê futbolcîtîya xo de formayê klûbanê muhîman ê sey Beşîktaş, Dîyarbekirspor, Altay, Goztepe, Manîsaspor, Bursaspor, Karabukspor, Antalyaspor, Bochum û Vitesse dayî xo ra. Kaloğlu, sezonê Super Lîgî yê 2004î de Beşîktaşî ra transferê Dîyarbekirsporî bi û di sezonî uca de kay kerd.
Karîyerê xo yê teknîk dîrektorîye rê serra 2022î de Altay de dest pêkerd û tewr peynî Gençlerbîrlîgî xebitna. Ame musayîş ke Kalogluyî wayîrê Lîsansê FÎFA Pro yo.
