Serekê Komîsyonê Yewîya Neteweyî, Birayî û Demokrasîye Numan Kurtulmuş û tayê endamê komîsyonî, çarçeweyê prosesê çareserîye yê meseleya Kurdan de ameyê Amed.
Nê çarçeweyî de Kurtulmuş û endamê komîsyonî tewrê Merasîmê Destpêkerdişê Serra Akademîke ya 2025/2026î yê Unîversîteya Dîcle bîy.
Destpêkê programî de wendekarê Konservatuarê Dewlete yê Unîversîteya Dîcle vejîyayî sehne. Dima ra sînevîzyonêko şinasnayîşî ame mojnayene. Qiseykerdişê destpêkî yê merasîmî, Rektorê Unîversîteya Dîcle Prof. Dr. Kamuran Eronatî kerd. Ey ra dima Walîyê Amedî Murat Zorluogluyî qiseykerdişêko kilm kerd.
‘NA REY MA DO SERBIKEWÊ’
Kurtulmuşî, qiseykerdişê xo de bale ante Prosesê Aştîye û gamê demokratîkî ser û nê çîyî vatî: “Ma sey 86 mîlyon welatîyan mesulîyetê ma o yo ke ma Tirkîya aver berê. Mesulîyetê ma awankerdişê yew cuyê aştîyane, azadîye, demokrasî û yewîye yo. Na rey ma do serbikewê. Na rey aştîye, birayî û aramîye do serbikewo. Ma êdî nê welatî de nêwazenê gedeyanê xo defin bikerê, ma do çekan defin bikerê. Na xebata ke bi hawayêko demokratîk ameya destpêkerdene, hetê netîcegirewtişî ser şina. Ganî ma birayîya xo ya tarîxîye newe ra xurt bikerê. Ma zanê ke birayîye tena seba çareserkerdişê probleman bes nîya. Birayîye, edalet û demokrasî hîrê stûnê bingeyênî yê ameyoxê ma yê. Temînatê dewamkerdişê demokrasîye, peymana komelkî ya.”
Kurtulmuşî, yo ke Meclîs de qiseykerdişê bi Kurdkî yê Dayîka Aştîye asteng kerdbi, Amed de behsê muhîmîya ziwanê dayîke kerd. Kurtulmuşî va: “Ziwan, seba îfadekerdişê merdimî waro tewr baş o. Ziwanê dayîke sey şitê dayîke helal o. Nê welatî de qet yew kes seba ziwanê xo yê dayîke nêno astengkerdene. Cîyakerîya mabênê ziwanan de qet ferhengê ma de çin a.”
Kurtulmuş û heyeto ke ey reyde yo, dima ke Mescîda Girede de nimajê nîmerojî bikerê, do Walîtîya Amedî zîyaret bikerê.
