Amed de, masewano 67 serre Alî Malkoç, 55 serrî yo ke rizqê xo Çemê Dîcle ra vejeno. Malkoç, bi keleka xo ya ke tekeranê wesayîtan ra viraşta, mîyanê yew resimê sey tabloyî de masewanîye keno.
"Ez debara xo bi masewanîye kena"
Alî Malkoç o ke pîyê 7 gedeyan o, îzah kerd ke no mesleg pîyê ey ra ey rê mendo. Malkoçî va, "Pîyê mi zî masewan bi. Masanê ke ez tepîşena, ez ge-ge roşena, ge-ge zî dana cîran û embazanê xo. Bi raştî, ez debara cuyayîşê xo bi nê karî kena."
Malkoç o ke wextê cîwanîya xo de asinkarîye kerda, îzah kerd ke o tebîetî ra hes keno. Malkoçî bi tecrubeyê xo yê 55 serran behsê çemî kerd û wina va: "Ez baş zana ke kamcî cayanê Çemê Dîcle tehlukeyin ê. Wexto ke awe berz bena, ez masan nêtepîşena. Wextanê qedexeyan de zî ez nêşona, çunke her çî bi demsalê xo yo."
"Çemê Dîcle "
Baxçeyê Hewselî yê ke hetê Çemê Dîcle de yê, serra 2015î ra nat Lîsteya Mîrasê Dinya ya UNESCOyî de yê. Semedo ke beşê çemî yo ke mîyanê Amedî ra vîyêreno, bi awayêko fermî sey "çem" nêno vînayîş, nêno pawitene. No hal zî, dem dem beno sebebê mergê masan ê bi kom.