Enwer Yılmaz
Amed de vizêr, onca yew Newrozo tarîxî estbi. Se hezaran kesî herikîyayî meydan û pê coş û hêvîye Newroz bimbarek kerdî. Na qerebalixîya ke her serre qat bi qat zêde bena, êdî meydanan de ca nêgêna. Newroz, seba şarê Kurdî tena ameyîşê wisarî nîyo; eynî wext de nameyê xoverdayîşî, estbîyayîşî û sey yew festîvalêko neteweyî yo.
Emser hetêk ra nermîya hewayê aştî û muzakereyan ameyêne hîskerdiş, heto bîn ra ma onca şahad bîyê ke hişmendîya “asayîşkar” a kehene kerd ke sîya bivisno nê coşî ser. Nimûneyo zelal û balkêş ê nê kerdenan zî, o bi ke vera nameyê Selahattîn Demîrtaşî tahamul nêame kerdiş.
Nê halî reyna nîşanê ma da ke; Selahattîn Demîrtaş mîyanê sîyasetê Kurdan de sîyasetmedaranê en heskerde, tesîrkar û karîzmatîkan ra yew o. Her çiqas mabên ra xeylê serrî vîyartê zî çewî Selahattîn Demîrtaş xo vîrî ra nêkerd. Heskerdişê şarî yê vera ey roje bi roje hîna zaf xurtêr bi
Hesretê new serran
Rewşa Demîrtaşî yo ke tam 9 serrî yo şarê xo ra, mucadeleyê xo ra û keyeyê xo ra cîya ameyo verdayîş û mîyanê çar dîwaran de yeno tepiştiş, wicdanan de yew birînêka xorîne ya. Zindan de tepiştişê yew lîderêko wina ke, şar heta peynî bawerîye bi bêsûcbîyayîşê ey keno û o bi xîtabet û fîkranê xo yê sîyasîyan mîlyonan peyê xo de kaş keno, tena yew zulmêko huqûqî nîyo, eynî wext de yew zulmêko însanî yo zî.
Demîrtaş, tena yew sîyasetmedar nîyo; ewro seba şarê Kurdî bîyo sembolê hêvîye, aştî û sîyasetê demokratîkî.
Seke her Newroz de yeno vînayîş, emser zî ame dîyîş ke şarê Kurdî zaf bêrîya Selahattîn Demîrtaşî keno. Şar wazeno ey tena sey yew “name” nê; sey lîdero ke temînatê prosesê çareserîye, aştî û ameyoxî yo, xo mîyan de bivîno.
Beno ke Demîrtaş hetê fîzîkî ra Edîrne de zereyê yew hucre de bo; labelê vizêr Newrozê Amedî de her govendgirewtiş de, her slogano ke ame eştiş de û her flamaya ke abî de, o uca de bi. Şima eşkenê yew lîdero ke zerrîya şarî de taxt ronayo, tepişê û hepis bikerê.