Enwer Yılmaz
Seke ma zanê vizî polîsan eştbi Şaredarîya Colemêrgî ser û Hemşaredar Mehmet Siddik Akiş ame girewtiş û erzîya hepisxane.
Netîceya weçînayîşanê 31ê adare de namzedê DEM Partî Mehmet Siddil Akiş bibi hemşaredarê Colemêrgî. Wezîrîya Karanê Zereyî badê beyan kerd ke Şaredarîya Colemêrgî rê qeyûm ameyo tayînkerdene. Badê zî Walîyê Colemêrgî sey qeyûm ame tayînkerdene.
Tayînkerdişê qeyûman ser o zaf çîyî vajîyayî. La ez wazena resimêk ser o hîsanê xo bi kilmî şima dir pare bikî.
Xora nika verê pêrûna şaredarîyan de nobete esta. Colemêrg de şewa bîne zaf parlementerî û serekê şaredarîyan hetanî serê sibayî nobete girewtî. Ewro zî Hemserekê pêroyî yê DEM Partî uca de bî. Heqê înan o ke vengê xo vejî. Eke yewî malê to dizna, to rê neheqîyêk kerd normalo ke ti vengê xo vejî, heqanê xo bipawî. Labelê vizêr ra nata polîsî midaxeleyê protestoyanê demokratîkan kenê. Rojnamegerî û kesê ke hetê şarî ra ameyê weçînitiş yenê derbkerdiş û awa tazîkine verdîyena înan ser o.
Hukmat çira wîna keno o çîyêko bîn o. Verg verg o xora. Verg çi rey nêbeno mêşine. Verînanê ma zî çi weş vato “Goliko sîya sipê nêbeno” yan zî “Pîsînge pê şanekerdiş nêbena însan”
Beno ke deynê hukmatî esto, beno ke qayîlo zerrîya MHP weş biko, beno ke terseno kadroyê ke pê qeyûman şaredarîyan de ca bîyê bêrê eşriş, beno ke nêwazeno wa Kurdî xo rayberê. Ma eşkenê “beno ke” tîya ra heta colemêrg derg bikê.
Labelê yew raştî esta, Tirkîya de êyê ke sebebê bêhuzurî yê Kurdî bi xo nîyê. Êyê ke sebebê merdişan, çîne bîyayîşê demokrasî, bêedelî û bêhûqûqî yê, êyê ke dewlete îdare kenê bi xo yê.
Kurdî tena wazenê bi nasnameyê xo xo îdare bikê û wayîrê Kulturê xo, erdê xo vejîyê. No çîyêko zaf normal o. Labelê çi hukmato nikayîn beno çi zî ê verînî benê Kurdan sey însanan, sey merdimanê medenîyan nêvînenê û qebûl nêkenê.
Nika ez bêrê nê resimî ser. Resim de yew cinî esta. Bewlîyo ke cinîyêka dejaye ya, zerrîya aye zaf dejayo. Vizîr ra nata na cinî verê TOMAyanê dewlete de binê awe de xo ver dana.
Resim de destê xo hewanayê û hewar kena. Dewlete hende ci rê zulum kerdo… Rîyê aye ra her çî fam beno. Rîyê aye maneno rîyê pêrûna cinîyanê Kurdan. Rîyê aye de şan û şerefê miletê ma esto. Rîyê aye de vera zulmî, vera neheqî hêrs esto…
No hêrs, hêrsê dayîkanê ma Kurdan o. Şima benê nê hêrsê rîyê cinîyanê ma Kurdan ra bitersêne.
