ZAZAKÎ NEWS - Serekê Pêroyî yê CHPyî Ozgur Ozel, seba Serekcumhur Tayyîp Erdoğanî va, “O partîyanê muhalefetî yê (zeîfan) sey Rûsya wazeno.”
Ozgur Ozelî rojnameyê Financial Timesî yê Brîtanya rê qisey kerd, va ke Serekcumhur Tayyîp Erdoğan keno ke sîstemêko yewpartî yo sey Rûsya awan bikero û CHP vernîya ney de astengo peyên o.
Serekê CHPyî, qerarê mehkemeyî yo ke seba serekîya rêxistina şaristanî ya Îstanbulî de ame dayîş sey ‘darbeyêka vera partîya îqtîdarî ya sibarojî’ name kerd û wina dewam kerd:
“Ê xîret kenê ke partîya ke weçînayîşanê peyênan de serkewta, partîya ronayoxe ya Komara Tirkîya ya û pêro anketan de aver a, çîne bikerê.
Ma rî bi rîyê yew îqtîdarê otorîterî yê. Yew îhtîmal esto, o zî xoverdayîş o.”
Ozelî derheqê dewaya kongreyî ya 15ê Êlule de zî va, “Eke Erdoğan kayanê qilêrinan kay keno, ma zî eşkenî kay bikerê… Ma eşkenî bi yew hîlekarîyêka sey ci cewab bidê.”
Serekê pêroyî yê CHPyî da zanayene ke vera zextê ke yenê, planê înan ê cîyayî estê ke mîyanê înan de çalakîyê ‘haştîyane’ yê ke eşkenê ‘cuye bîyarê noqtaya vindarnayîşî’ zî estê. Erdoğan zano ke o nêeşkeno weçînayîşan de ser bikewo. Ayra zî o partîyanê muhalefetî yê (zeîfan) sey yê Rûsya wazeno.”