ZAZAKÎ NEWS - Serekê Partîya ÎYÎ yê Mêrdînî Suleyman Akar, semedo ke paştî bido prosesê çareserîye, pîya bi îdarekaranê qezayanê Nisêbîn, Kerboran, Artuklu, Şemrex, Reşmîl û Stewrê, partîya xo ra îstîfa kerd.
Serekê Şaxa Partîya ÎYÎ yê Mêrdînî Suleyman Akarî, va ke, înan bi hawayêko komekî Partîya ÎYÎ ra îstîfa kerdo û no qerar sey yew qeraro sîyasî nê, sey yew mesuldarîya wijdanî û tarîxî girewta.
Akarî eşkerayîya xo de va: “Ganî êdî nê erdî ser o gonîya yew kesî zî nêrijîyo, ganî qet yew tut bêmay û qet yew may bêtut nêmano. Seba naye, post, û kursî yenê fedakerdiş; tena wa Tirkiya de aştî, edalet û aramîyêka daîmî hakîm bo.”
Akar vano, Tirk û Kurdan awankerdişê Komare de gift bi kift şer kerdo û ganî na yewîya tarîxî daîmî bo.
Partîya ÎYÎ, Parlamentoyê Tirkiya de tek partî ya ke vera prosesê çareserîya persa Kurdan de ya û îqtîdarî bi xîyanetkerdişî sûcdar kena.
Hetê bînî ra, tek partîya ke beşdarê Komîsyonê Hemkarîya Mîlî, Biratî û Demokrasî nêbîye, Partîya ÎYÎ ya.