11ê Teşrîna Peyêne de, qezaya Pasûrî ya Amedî de, mabênê taxanê Tepecik û Karabûlakî de şantîyeya vîyadukêk de wexto ke beton kerdêne ro, iskele şîya we. Netîceyê rijyayîşî de 5 karkerî kewtî waro, 4 karkerî cayê hedîseyî de cuya xo vîndî kerde, tedawîyê 1 karkerî nêweşxane de dewam keno.
Badê hedîseyî, hetê Serekdozgerîya Komare ya Amedî ra bi sûcê “bi qisûrî sebebîyetdayîşê merg û birîndarbîyayîşî” tehqîqat ame destpêkerdiş. Tehqîqat hetê wekîlêkê serekdozgerî û di dozgeran ra yeno rayraberdiş. Etapê verênî de 4 kesî, rojanê peyênan de zî 6 şikdarê bînî ameybî tepiştiş.
10 şikdaran ra yew ame veradayîş. 9 şikdarê ke sewqê edlîye bîy, înan ra yew dima îfadeyê dozgerîye ra serbest mend û 8 kesî zî bi waştişê tepiştişî vejîyayî mehkeme.
Hakimtîya Cezaya Sulhî ya Pasûrî, derheqê şikdaran de muhendîsê înşaatî K.K., wayîrê fîrmaya taşerone û şefê ekîbê iskeleyî F.L. û şefê şantîye Î.B. de qerarê tewqîfkerdişî da.
Çarçeweyê tehqîqatî de ame eşkerakerdiş ke seba tepiştişê 3 şikdaranê bînan zî xebatî dewam kenê.