Mihemed Kurdî
Vakurê Kurdistanî de gama ke qala pawitişê ziwanî bena, zaf rey mi dîyo û ez bîya şahîd ke şar, bilxassa camêrdî vanê; "Maya tutan her tim keye de yê, eke înan tutanê xo reyde bi ziwanê xo qisey bikerê, ziwanê ma qet vîndî nêbeno. Coka seba pawitişê ziwanî ganî mayê Kurdî keye de tenya bi Kurdkî tutanê xo reyde qisey bikerê."
Her tuto ke maya ci esta, raya verêne aye reyde musayîşê cuye û her çîyê bînî keno. Yanî yewin mamosteya heme merdiman dayîke/maya înan a û yewin wendegehê heme tutan zî keyeyê înan o. La nêbeno ke ma nê barê giranî (pawitişê ziwanî) tenya bifişê milê mayanê Kurdan; çimkî no şeref (ziwanê Kurdî) tenya yê cinîyan nîyo, yê ma pêrîne yo. Aye ra ganî ma Kurdî heme (camêrd, ciwan, laj, keyna) destanê xo bikerê binê nê barê giranî û tenya mayanê xo sûcdar nêkerê. Xora eke hêkat, estanik û kilamê mayanê ma nêbîyêne, heta nika ziwanê ma zî nêmendibi.
Cinîyê Kurdî Bi Hêzê Xo Eşkenê Ziwanê Kurdî Bipawê
Mi gore vakurê Kurdistanî de xelasîya Kurdan destê cinîyanê Kurdan de ya. Çimkî yê ke bi hezaran serran o vera heme tewir zehmetî û zilma dagîrkerdoxan ziwanê ma (Kurdî) pawito û resnayo roja ma, mayê ma yê Kurdî yê. No wayîrvejîyayîşê ziwanî û xoverdayîşê mayanê ma yê vera zulmî de zî pîlbîyayîşê hêzê cinîyanê Kurdan mojneno.
Seba ke heta nika ziwanê ma pawito, ma deyndarê mayanê xo yê; la seba ke nika ra dima zî ziwanê ma est bo, ganî ma zî hetkarîya mayanê xo bikerê. Çimkî cinîyê Kurdî sey verê cû tenya karê keyeyî nêkenê û keye de nêvindenê. Êdî cinîyê Kurdî heme waranê cuye de; sey kar, şoreş, sîyaset, tîcaret ûêb. ca gênê. La seba ke cinîyê Kurdî heme waranê cuye de ca gênê, na a mana nêna ke do ziwanê xo ca verdê. Eksê ci, cinîyê ma eşkenê heme waran de zî bi Kurdkî biciwîyê û bi hêzê xo yê bêhempa ziwanê ma yê rindekî bipawê.
Pawitişê Ziwanî Wezîfeyê Heme Kurdan o
Hîrê alametê mînafiqan estê, înan ra yew zî emanetan rê xîyanetkerdiş o; yanî gama ke yew çîyêkî emanetê înan bikerê, ê (mînafiqî) nêeşkenê ê emanetî bipawê. Ziwanê Kurdî zî emanetêko ke Homayî dayo ma Kurdan; eke ma nê ziwanî rê wayîr nêvejîyê û xo vîra bikerê, o çax ma îxanet bi emanetê Homayî kenê. Senî ke pîlanê ma heta nika bi serberzî nê şerefî (Kurdî) rê wayîr vejîyayê û ardo heta roja ewroyêne, ganî ma zî bi emrê Homayî razî bê û bi Kurdbîyayîşê xo serberz bê û her ca de wayîrê ziwanê xo bivejîyê. Raşt a ma bindest ê û barê ma zî zaf giran o, la eke ma dewaya xo de zerrî ra bê, çi hêz nêeşkeno ziwanê ma çin bikero.
Ziwanê ma, maya ma ya. Ganî mayê ma tutanê xo bê maye meverdê û ganî tutê ma zî mayanê xo rê wayîr bivejîyê.
Seke ma pêro zî zanenê, ziwanê ma ziwanê perwerdeyî nîyo; aye ra şansê ma yê ke ma wendegehan de ziwanê xo bimusê û aver biberê, çin o. Na raye ra, eke ma Kurdî keyeyanê xo de ziwanê xo bander nêbê, sewbîna şansêkê ma yê ke ma ziwanê xo bimusê çin o. Yanî keye ra vêşêr sewbîna cayê ke ma Kurdî tede ziwanê xo bimusê çin ê. Aye ra ganî ma heme keyeyanê xo bikerê wendegehê ziwanê Kurdî û tutanê xo bi kultur û ziwanê xo pîl bikerê û bi no qayde vernîya asîmîlasyonî bigêrê.
Seba ke tutê ma reyna kuçe, taxe, dewe, deşte, qeza û şaristanan de bi ziwanê xo kay bikerê û seba ke ancî hewnanê xo bi Kurdkî bivînê; wa ma pêro pîya bi pêşengîya cinîyan bibê pêşmergeyê ziwanê Kurdî û heta ke bibê wayîrê statuyî, ma xizmetê na xelata erjaye ya ke Homayî dayo (ziwanê Kurdî), bikerê û bipawê.
