Serrgêra qelîamê Sêwasî ya 30ine de semedê 33 kesanê ke qetlîam de bi vêşnayîş hetê nijadperestan ra ameybî kiştiş, verê otêlê Madimakî de programê yadkerdişî virazîya.
Serrgêra qelîamê Sêwasî ya 30ine de verê Otêlê Madımakî o ke serra 1993î, roja 2ê Temuze de 33 roşnvîr, nuştox û hunermendî tede ameybî vêşnayîş, qetilkerdiş de qerenfîlî ameyî ronayîş.
Xeylê komelî û federayonê Ewlewîyan û partîyê sîyasî zî programê yadkerdişî de ca girewtî û paştî day ci.
Serekê Pêroyî yê PSAKDî Cuma Erçeyî uca de xîtabê şarî kerd û waşt wa Otêlê Madımakî bibo ‘Muzeya şermî’ êna va "Ma semedê pêrûna ganeyan edelet wazenê. Ma semedê heme kesanê ke rastê neheqî, zulum ameyê edelet wazenê. Qetlîamê Sêwasî ser ra 30 serrî vîyartî. Ma 30 serrîyo ke edeleto ke peyê ci de yê nêdîyo. Ma kuçeyan, salonanê mehkemeyan de edelet gêray la ma nêdvîna. Kerdoxê qetlîamî hema zî nêvejyay werte. Heta ke vejîyê werte do micadeleyê ma dewam biko."
Cuma Erçeyî îfade kerd ke, eke ê faîlanê nê qetlîamî nêvejê werte, qetlîamê bînî zî do biqewimîyê û waşt wa pêro Elewîyî bibê yew, pîya micadele bikê.
