Serrgêra 10ine ya Qetlîamê Garê Anqara de qurbanîyê hêrişî cayê hedîseyî de bi merasîmêk ameyî yadkerdene.
Hemserekê Partîya DEMî Tuncer Bakirhan çalakîya yadkerdişî de qisey kerd.
Mîtîngê Aştîye, ke hetê partî û sendîkayanê sey HDP, KESK, DÎSK, TTB û TMMOByî ra amebi organîzekerdene de, 10ê Teşrîna Verêne 2015 de 2 endamanê DAÎŞî hêrişêko xokiştişî kerdbi. Netîceyê teqayîşan de 104 kesan wefat kerdbi û 500 ra zêde kesî zî birîndar bîbîyî.
Çalakîya yadkerdişî ya ewroyêne de, teberê keyeyanê qurbanan û kesanê ke qetlîam de birîndar bîbîyî de, xeylê temsîlkarê organîzasyonanê komela sîvîle û partîyanê sîyasîyan amade bîyî.
Hemserekê Pêroyî yê Partîya DEMî Tuncer Bakirhanî qiseykerdişê xo de vat:
"Ez nameyê Partîya DEMî ser o, keyeyanê şehîdanê Garê Anqara silam kena. Embazanê şehîdanê Garî silam kena. Wa her kes hol bizano ke ma nê qetlîamî xo vîr ra nêkenê û nêdanê vîr ra kerdene. Hetanî ke raştîya nê qetlîamî nêvejo werte, ma do keyeyan û embazanê şehîdanê Garî reyde mucadeleyê xo dewam bikerê."
Derheqê qetlîamî de, badê muhakemeyêko 9 serran, 26ê Hezîrane 2024 de 10 mehkûman rê cezaya muebedî amebî birînayene la 16 sucdarê ke nameyê înan dosya de yo, heta nika nêameyê tepiştene.