Yewîya Cinîyan a BMyî (UN Women) û Ofîsê Sucan ê BMyî (UNODC), raporê "2024 de Cinayetê Cinîyan" weşanay. Rapor daneyê 117 welatan ra ame amadekerdiş.
Goreyê raporî, serra 2024 de nêzdîyê 50 hezar cinî û gedeyî, hetê partneranê xo yan zî endamanê keyeyê xo ra ameyî qetilkerdiş.
Raporî de eşkera bi ke serra 2023 de na hûmare 51 hezar û 100 bîye. Aseno ke serra 2024 de hûmare tayê kêmî bîya, la rapor bal anceno ser ke no "yew kemîbîyayîşo raştkên" nîyo. Seba ke tayê welatan daneyê xo nêşirawitê, reqemî kêmî asenê.
Se ra 60ê cinayetan 'zereyê keyeyî' de kişîyayê
Raporî da zanayîş ke 2024 de pêro pîya 83 hezar cinîyî bi qesdî ameyî kiştiş. Nê amari ra se ra 60 (%60) hetê partner yan zî merdiman (eqrebayan) ra ameyî kerdene. Yanî, her roje 137 cinîyî hetê kesêkê nêzdîyê xo ra yenê qetilkerdiş.
Efrîqa de rewşe krîtîk a
Goreyê raporî, 22 hezar û 600 cinayetan reyde Efrîqa herêma tewr xirab a. Efrîqa de her 100 hezar cinîyan ra 3 cinîyî yenê qetilkerdiş û no nisbet dinya de tewr berz o.
Şîdetê zereyê keyeyî
Rapor de rewşa Ewropa û Amerîka ser o zî nê ameyî vatene: "Ewropa û Amerîka de cinîyî zafêr hetê partneranê xo ra yenê kiştiş. 2024 de kişîyayîşê cinîyan ra; Ewropa de se ra 64, Amerîka de se ra 69 hetê partneran ra ameyî kerdiş. Coka têkoşînê vera şîdetî de ganî tena 'partner' nê, têkîlîyê hîrayî yê keyeyî zî bêrê destgirewtene."