ZAZAKÎ NEWS - Wezaretîya Pawitişî ya Sûrîye eşkera kerd ke goreyê pîameyîşê newî yo ke mabênê Hukmatê Sûrîye û Hêzanê Sûrîyeya Demokratîke (HSD) de ameyo kerdiş, adirbesto ke emşo ra tepîya vîyareno û do 4 rojan dewam bikero, ameyo îlankerdiş.
Eşkerayîye de ame vatiş ke, mabênê artêşa Sûrîye û HSDyî de pêrodayîşî 4 rojî ameyê vindarnayÎŞ. Adirbest do ewro Sêşeme, 20ê Çeleyê 2026î de saete 20.00 de dest pêbikero.
HSD: Ma pabesteyê pîyameyîşî yê
HSDyî zî eşkerayîyêka nuştekî da û mesajê kêmkerdişê pêrodayîşan da. Eşkerayîye de wina ame vatiş:
“Ma eşkera kenê ke hêzê ma bi temamî pabesteyê pîyameyîşê adirbestî yê. Ma teyîd kenê ke heta ke hêrişê hêzanê ma nêro kerdiş, ma do tu herekatê leşkerî nêdê dest pêkerdiş. Ma teyîd kenê ke ma seba rayîranê sîyasîyan, çareserîyanê muzakerekaran û dîyalogî akerde yê."
Mabênê Şam û HSDyî de Pîyameyîşê 'Hesekê'
Serekkomarîya Sûrîye zî eşkera kerd ke mabênê Hukmatê Sûrîye û Hêzanê Sûrîyeya Demokratîke (HSD) de derheqê ameyoxê Wîlayetê HesekÊ de serê babetanê cîya-cîyayan de "pêameyîş " virazîyayo.
Eşkerayîye de ame vatiş ke hêzê leşkerî yê HSDyî do entegreyê Wezaretê Pawitişî bibê.
Ame îfadekerdiş ke Fermandarê Pêroyî yê HSDyî Mazlum Ebdî do seba wezîfeyê Hetkarîya Wezîrê Pawitişî yew namzedê HSDyî û seba Walîtîya Heseke zî yew namzed pêşnîyaz bikero. Teberê nînan de, Ebdî do seba Meclîsê Şarî lîsteya nameyan û lîsteya kesanê ke do dezgehanê dewlete yê Sûrîye de bêrê xebitnayiş zî pêşkêş bikero.
Tetbîqkerdişê pîyameyîşî do ewro saete 20.00 de dest pêbikero.