ZAZAKÎ NEWS - Şubeyê Komela Heqanê Merdiman (ÎHD) ê Dêrsimî, eşkerayîyêK da û waşt ke noqtayê kontrolî yê GBT yê ke şaristan de zêde yê û cuya rojane xirab kenê, bêrê wedaritene.
Şubeyê Komela Heqanê Merdiman (ÎHD) ê Dêrsimî, derheqê noqtayanê GBT yê ke şaristan de zaf ê, eşkerayîyêka nuştekîye da. ÎHDyî, eşkerayîya xo deîzah kerd ke nê noqtayê kontrolî ke şaristan de yê, bi negatîf tesîrê cuya rojane ya welatijan kenê û waşt ke bêrê wedaritene.
Şubeyî va: “Kewtişê şaristanî de, rayîranê qezayan ser o, rayîrê Xarpêt-Dêrsimî ser o, mehelayan de, merkez de û dewan de, her ca de noqtayê kontrolî ameyê ronayene û şar înan ra aciz o.”
Eşkerayîye de ame îfadekerdene ke şar wexto ke şono keyeyê xo zî zaf rey înan ser o gêrayîşê GBT yeno ferzkerdiş û wina dewam kerd: "Na rewşe, tena tedbîrêko rûtîn ê asayîşî nîyo. Cuya sîvîle krîmînalîze kena û bi bahaneya asayîşê komelkî, hişmendîya desthilatdarî û şîdetî şar ser o daîmî keno. No ferzkerdişo ke her saeta rojî û her rojanê serre yeno kerdene, azadîya seyahet û gêrayîşî asteng keno. Reyna, demserrê hamnanî de merdimê ke yenê şaristan, binê germîya 40 dereceyî de yenê vindarnayene û na rewşe weşî û rûmetê merdiman çine hesibnena.”