Amed de Ahmet Coşkun o ke Nêweşxaneyê Cigêrayîş û Perwerdeyî yê Gazî Yaşargîlî de Asîstanê Cerahîya Pêroyî bi, keyeyê xo de merde ame vînayîş.
Goreyê malumatan, Ahmet Coşkun o 33 serre vizêr nêşî kar. Seba ke cewab nêda telefonan, cinîya ey a ke a zî doktore ya, şîye keyeyê înan o ke qezaya Peyasî de yo. Wexto ke ber nêame akerdiş, cinîya ey xeber da ekîbanê îtfaîye û 112î. Wexto ke ekîbî kewtî zere, înan dî ke Doktor Coşkun merde yo. Cigêrayîş de ame tesbîtkerdiş ke doktoro cîwan cayê hedîseyî de merdo.
Cenazeya Doktor Ahmet Coşkunî, dima ke Sazgehê Tibê Edlî de otopsîya ci ameye kerdiş, şawîya welatê xo Riha. Ame musayîş ke Coşkunî serra vîyarteyî bi yew asîstana nêweşîyanê cinîyan de zewicîyayo.
Serekdozgerîya Komare ya Amedî derheqê hedîseyî de tehqîqat da dest pêkerdiş. Rayberdoxîya Nêweşxaneyê Cigêrayîş û Perwerdeyî yê Gazî Yaşargîlî zî seba mergê Ahmet Coşkunî peyameka serweşîye weşana.
3 rojî verê cû zî asîstanêka bîne merdbî
Hefteyê vîyarteyî de zî, asîstana doktorî ya ke Nêweşxaneyê Didanî yê Zanîngeha Dîcle de xebitîyêne, Ozge Salmane, keyeyê xo de merde ameybî vînayîş.
Çimeyê Xebere: Amida haber
