Şaredarîya Peyasî, kişta Nêweşxaneyê Cigêrayîş û Perwerdeyî yê Gazî Yaşargîlî de, seba merdimanê nêweşan, personelanê nêweşxaneyî û refaqatçîyan tesîsêko sosyal virazena.
Şaredarîya Peyasî, cayo ke her roje bi hezaran kesî hem zereyê bajarî ra hem zî teber ra seba xizmetê weşîye yenê, Nêweşxaneyê Cigêrayîş û Perwerdeyî yê Gazî Yaşargîlî de tesîsêko sosyal virazena.
Eşkerayîya ke hetê şaredarîye ra ameye dayene de wina ame vatene: “Na herêma ke goreyê îstatîstîkan her roje 14.000 kesî zîyaret kenê, ma do seba personelanê nêweşxaneyî, merdimanê nêweşan û refaqatçîyan cayêk virazê. Tesîso sosyal do 250 m² warêko girewte û kapasîteyê 200 kesî ra bêro pê. Menganê hamnanî de zî warê akerde de do hîna zaf kesî bieşkê tesîsî ra îstîfade bikerê.”
Eynî eşkerayîye de wina ame vatene: “Tesîso ke do bêro viraştene de, werd û xizmetê bînî do bi fîyetêko munasîb bêrê dayene. No tesîs, tena cayê werd û îsrehetî nê, do bibo warêko pêroyî yê cuyayîşî ke tede her kes bieşko nefes bigîro û bi ewleyî wextê xo bivîyarno.”
Şaredarîye do rojanê verê ma de dest bi viraştişê tesîsê sosyalî bikero.
